Kryebashkiaku i Durrësit Vangjush Dako, u shfaq për të dytën herë i qetë në raport me disa përgjime të publikuara në media, së fundi dhe në VOA, ku aludohet për blerje vote, kjo referuar disa bisedave mes tij dhe Avdulajve të Shijakut.
Në Open në TCH, Dako u shfaq i pakompleksuar, duke u shprehur fillimisht: “Më vjen mirë madje që i publikuan, nuk kam aspak problem pse janë publikuar, por të flasësh për favorizime për bordura a kanalizime, sepse këto janë punët tona të përditshme në çështjet bashkiake, nuk e shoh të arsyeshme”.
Dako mohoi kategorikisht që ato përgjime të tregonin, apo dhe të fshihnin afera për blerje votash. Ai i konsideroi si normale bisedat në telefon, madje dhe raportet e tij me Avdulajt, duke i përcjellë në një kontekst që ka lidhje me detyrën e tij si kryebashkiak e politikan.
“Për mua ata janë votues të Partisë Socialiste, të paktën këtë radhë, pasi në zgjedhjet e ardhshme ndoshta mund të përkrahin të tjera palë. Ne kemi struktura dhe koordinatorë elektoralë, që merren me fushata dhe përpjekje për të siguruar mbështetje nga qytetarët”, tha Dako. /tesheshi.com/
