Dy nga industritë kryesore aeronautike në botë, Airbus dhe Dassault, kanë njoftuar se kanë arritur një marrëveshje për të vazhduar me fazën tjetër të zhvillimit të avionëve luftarakë evropianë të gjeneratës së ardhshme FCAS (Future Combat Air System).
Programi FCAS u njoftua për herë të parë në vitin 2017 nga presidenti francez Emmanuel Macron dhe më pas kancelarja gjermane Angela Merkel. Avionët e rinj luftarakë do të zëvendësojnë Eurofighter dhe Rafale dhe – sipas planit origjinal – do të jenë gati operacionalisht në vitin 2040, një datë që mund të jetë mjaft optimiste.
Partnerët industrialë në program janë Airbus në emër të Gjermanisë, Dassault i Francës dhe Indra i Spanjës. Programi ishte “ngrirë” për shkak të mosmarrëveshjeve midis Airbus dhe Dassault.
“Kjo marrëveshje industriale përfaqëson një hap të madh përpara për programin kryesor të mbrojtjes evropiane,” tha CEO i Airbus Defense and Space, Mike Selhorn.
Më herët, kreu i Dassault Aviation, Eric Trappier i tha gazetës Le Figaro: “Sot, po, është një fakt. Ne kemi një marrëveshje me Airbus”. “Kemi marrë të gjitha garancitë e nevojshme për të kaluar në fazën tjetër që, ju kujtoj, ka të bëjë me studimet paraprake”, shtoi ai.
Ministri francez i Mbrojtjes Sebastien Lecorny përshëndeti marrëveshjen e së enjtes. “Ky program pasqyron bashkëpunimin që ekziston në nivel evropian për mbrojtjen dhe pajisjet, në të cilin Franca luan një rol qendror”. /tesheshi.com/
