Nga Blendi Gashi
Qeveria e Kosovës nuk ka dhënë sinjale që marrëveshja për shënimin e vijës kufitare me Malin e Zi do të procedohet në Kuvend gjatë javës që vjen, ashtu siç deklaroi të premten kryeparlamentari Kadri Veseli.
Nëpërmjet një kumtese për medie të Kuvendit, ditën e premte, pas një bisede telefonike që Veseli zhvilloi me zv. ndihmëssekretarin e SHBA-së, Hoyt Brian Yee, ka thënë se janë pajtuar që marrëveshja për Demarkacion të procedohet nga qeveria për miratim në Kuvend javën tjetër.
Por, qeveria në kumtesën e saj pas bisedës telefonike Mustafa-Hoyt Lee nuk ka dhënë një afat kohor për Demrkacionin duke thënë se ata janë pajtuar që marrëveshja të ratifikohet sa më parë, si konfirmim i rrugës evropiane.
Dy ditë nga “dakordimi” Hoyt Yee – Veseli, kryeministri Mustafa, nuk e ka thënë asnjë fjalë as për mediat, duke bërë të paqartë nëse do procedohet apo jo Demarkacioni, derisa ditë më parë në një intervistë deklaroi se “Demarkacioni mund të mos procedohet deri në fund të muajit maj apo në fillim të muajit qershor”.
Bajram Gecaj, këshilltar i Mustafës në një deklarim për media ka përjashtuar mundësinë që marrëveshja në fjalë do jetë para ligjvënësve javën e ardhshme.
Ndërsa, Faton Abdullahu, këshilltar për media i Mustafës përmes një shkrimi në Facebook ka bërë të ditur se se kryeministri do të udhëtoj javën tjetër në Bruksel siç thuhet për të bindur zyrtarët atje që ta suspendoj për një kohë kushtin e vendosur pa të drejtë, pra atë të Demarkacionit, për vizat, me mundësinë e rikthimit të tij në rast se brenda periudhës së caktuar nuk përmbushet edhe ky kusht.
Hezitimi i Mustafës
Mustafa, raportohet se do qëndroi në Bruksel deri ditën e enjte, duke bërë të pamundur ratifikimin e Demarkacionit të paktën deri në këtë ditë.
Dhe mbeten e premtja, e shtuna dhe e diela e javës së ardhshme si ditë të mundshme që qeveria të procedojë Demarkacionin në Kuvend ashtu siç ka paralajmëruar Kuvendi.
Kujtojmë se hezitimi i Mustafës dhe krejt ky prolongim i çështjes se Demarkacionit ndërlidhet me mungesën e votave.
Në LDK raportohet se janë 9 deputetë kundër version aktual të Demarkacionit, në anën tjetër, në PDK vetëm 2 deputetë.
Ndërsa partitë opozitare janë unike se Demarkacioni nuk duhet të ratifikohet, kanë qëndrime të kundërta për metodat që do përdorin.
Lëvizja Vetëvendosje ka paralajmëruar se nëse është e nevojshme do hedh dhe gaz lotsjellës për ta pamundësuar ratifikimin e marrëveshjes në fjalë, derisa AAK e NISMA kundërshtimin e tyre me gjasë do e bëjnë vetëm përmes votës kundër.
Ndryshe, tashmë partia më e madhe në vend, PDK ka një qëndrim zyrtar se nëse dështon ratifikimi i Demarkacionit, atëherë duhet t’i hapet rrugë zgjedhjeve të parakohshme parlamentare. /tesheshi.com/
