Vangjush Dako, ish-kryebashkiak prej tre mandatesh i Durrësit, nga PS, ndodhet tashmë në qeli vetëm për një pallat, denoncuar nga banorët e atyshëm, për leje abuzive katesh, gjë që ka rezultuar me dëmtime të rënda gjatë tërmetit, deri në braktisje.
Pra, nuk është fjala për ndonjë aferë të madhe, por për shkelje të cilat kanë si viktima banorët e pallatit. Një prej tyre, ai që e ka çuar çështjen në SPAK, mban dhe mbiemrin Dako. Quhet Bashkim.
Bashkim Dako tha për Euronews Albania se nuk ishte një arrestim që e kënaqte.
“Arrestimi i sotëm është arrestim për bujë politike, për asgjë tjetër. Kallëzimin e kemi bërë që para tërmetit pasi në pallat janë shtuar kate pa leje, asnjë nga pallatet nuk ka pilota, janë direkt në beton dhe pa asnjë garanci sigurie.
Denoncimi i parë është në 2018, në 2019 e më tej në SPAK, e kemi çuar në të gjitha institucionet. Akoma s’kemi marrë asnjë përgjigje.
Ky është arrestim politik. kjo nuk është zgjidhje për ne, është për të mbuluar vjedhjet. ky mbulon vjedhjet e të tjerëve tani. S’e besoj kurrë. Tre javë kam që e di unë këtë histori”, tha Dako për Dakon.
Kujojmë se bashkë me këtë të fundit janë arrestuar dhe zyrtarë të administratës së tij, me rol firmëtar në dhënien e lejes për kate shtesë në mënyrë abuzive. /tesheshi.com/
