Shefi i diplomacisë serbe, Ivica Daçic, deklaroi gjatë një interviste të dhënë për agjencinë Beta se Beogradi do të votojë kundër të gjithë vendeve ballkanike që kanë përkrahur Kosovën në UNESCO dhe organizatat e tjera ndërkombëtare.
Por më shumë se të tjerat, Daçiç ka sulmuar Greqinë, Malin e Zi edhe Maqedoninë dhe ka deklaruar se Serbia do të jetë kundër çdo iniciative të këtyre vendeve.
Daçiç tha se kjo nuk është hakmarrje, por politika e reciprocitetit dhe se Serbia nuk do të lejojë askënd të poshtërojë.
“Ne nuk mund të presim, por do të veprojmë menjëherë në organizatat ndërkombëtare, kur të etë një dokument të rëndësishëm për Maqedoninë, Malin e Zi, ne do të votojmë direkt kundër”, tha Daçiç.
Greqia, në të dyja votimet për anëtarësimin e Kosovës në UNESCO nuk ka përkrahur mocionin e Serbisë por ka mbajtur një qëndrim asnjëanës duke krijuar kështu një qëndrim drejt njohjes së ardhshme të shtetit të Kosovës.
Pikërisht këtë qëndrim Daçic e ka quajtur një “thikë pas shpine”, pasi sipas tij serbët i konsiderojnë grekët si “vëllezër”, si pasojë e religjionit të përbashkët ortodoks.
“Unë nuk jam duke thënë se ne tani do të duhet të marrim masa ndaj Malit të Zi, Maqedonisë apo Kroacisë e ndonjë tjetri, unë jam vetëm duke folur për qëndrimin tonë ndaj kërkesave të tyre, kur ata janë në rendin e ditës, por ndryshe për marrëdhëniet tona dypalëshe, ajo nuk ka të bëjë por është në lidhje me integritetin tonë territorial. Imagjinoni tani që serbët në Mal të Zi të deklarojnë shkëputjen”, tha ai.
/tesheshi.com/
