Edhe kreu i diplomacisë së Beogradit Ivica Daçiç ka shfaqur irritimin e tij pas unifikimit të përfaqësimit diplomatik në botë mes Tiranës dhe Prishtinës.
Duke ia faturuar këtë zhvillim kryeministrit Rama, i cili në fakt e promovoi këtë ide muaj më parë me emërimin e kosovarit Gent Cakaj në krye të Ministrisë së Jashtme shqiptare, Daçiç tha se kjo nuk duhej të ndodhte, pasi sipas tij Kosova është pjesë e Serbisë e nuk mund të ketë një politikë të jashtme të pavarur nga Beogradi.
“Rrjedhimisht, Rama duhej të arrinte këtë marrëveshje me Beogradin dhe jam i sigurt se ai nuk do të ndihej aspak në rrezik, por vazhdoi”, tha Daçiç, sipas së cilit edhe ky akt i fundit është pjesë e projektit për një “Shqipëri të Madhe”.
Ai vuri në dukje se nuk shqetësohet për Ramën, por që bashkësia ndërkombëtare nuk reagon ndaj përpjekjeve të dukshme për të krijuar të ashtuquajturën “Shqipëria e Madhe”.
“Ky plan dhe ky projekti nuk është më i fshehur, as nuk është një komplot sekret. Ai po realizohet në sytë e të gjithëve”, tha Daçiç. /tesheshi.com/
