Daçiç nga Tirana: “Zajednicën” nuk e firmosa unë, por do të zbatohet pas pak javësh

Ministri i Jashtëm serb, Ivica Daçiç, deklaroi nga Tirana se “Zajednica” do të nisë zbatimin për pak javë, edhe pse Gjykata Kushtetuese e Kosovës e ka dhënë një vendim dhe opozita ka bllokuar jetën politike në vend.

Shefi i diplomacisë serbe tha në konfenrencën për shtyp që mbajti me homologët e tij Ditmir Bushati dhe Paolo Gentoloni se nuk kishte qenë ai që e kishte firmosur Marrëveshjen e Asocacionit të Komunave.

Një deklaratë e cila nuk dihet pse u tha, por që duket se ka të bëjë pikërisht për konsumim politik në Serbi, kur dihet që Kryeministri Vuçiç pritet të shpallë zgjedhje të parakohshme si pasojë e mosmarrëveshjeve me partinë e Daçiç por edhe me Presidentin Nikoliç.

Në Tiranë është mbajtur sot takimi i përbashkët i ministrave të jashtëm të Shqipërisë, Italisë dhe Serbisë, ku në Pallatin e ish-Mbretit Zog, siç quhet Pallati i Brigadave, janë zhvilluar të gjitha takimet.

Siç u mësua nga deklarimet e mëpastajme në konferencën për shtyp, Serbia ka kërkuar pjesë në gazësjellësin TAP i cili do të ndërtohet duke pasur si rrugë furnizimi Azerbaxhanin, e që më pas nga Shqipëria do të përfundojë në Itali.

Serbia, nuk dihet nëse e ka sinqerisht këtë deklaratë kur nga ana tjetër nuk ka hequr dorë nga gazsjellësi rus.

Megjithatë, ministri i Jashtëm shqiptar, Ditmir Bushati, tha se mes tre vendeve u bisedua për projektet e përbashkëta ballkanike që do të financohen nga “Procesi i Berlinit”,  i cili vitin e ardhshëm do të udhëhiqet nga Italia.

Për këtë çështje Daçic deklaroi se Ballkani duhet të bëhet një rajon dhe të sillet si i tillë ku të gjitha vendet të veprojnë sipas interesave të tyre të përbashkëta.

“Ka një sektor mbi të cilin në mënyrë të veçantë është përqëndruar dhe vëmendja jonë, marrëdhëniet ekonomike dhe sektori i energjisë, i gazit, dhe sigurisht që rajoni Ballkanit perëndimor, sikurse dhe Italia gjenden me përballjen e një situate kundrejt një projekti të rëndësishëm, dhe po punojmë për të gjetur dhe bashkëndajmë projekte të tjera në vijim sikundër është TAP”, u shpreh ministri i Jashtëm i Italisë, Paolo Gentiloni.

Kurse shefi i diplomacisë shqiptare, Ditmir Bushati tha se “diskutuam për sigurinë, krizat me të cilat sot për sot përballet pellgu i Mesdheut, arkitektura e sigurisë europiane, dhe kam parasysh krizën e refugjatëve dhe nevojën për vazhdimin e përpjekjeve për t’i bërë ballë të gjithë komponentëve që shpërfaqet veprimtaria e terrorizmit ndërkombëtar dhe lufta që bëjnë vendet tona përsa i përket ekstremizmit të dhunshëm”. /tesheshi.com/