Ministri i Jashtm serb Ivica Daçic ndodhet në Prishtinë për të marrë pjesë në samitin për Ballkanin Perëndimor e organizuar nga BE ku merr pjesë edhe Komisioneri i Zgjerimit, Johanes Hahn. Ardhja e Daçiç në një konerencë të organizuar nga Republika e Kosovës, është shenjë kuptimplote e një realiteti të ri diplomatik. Ardhja e Daçic është shoqëruar me një organizim të përforcuar nga qeveria e Kosovës dhe me masa sigurie të rritura. Hyrja e ministrit të jashtëm të Serbisë në hotelin Swiss Diamond ku zhvillohet takimi është shoqëruar me një eskortë të stërmadhe.
Kosova sot është mikpritëse e konferencës ministrore të gjashtë shteteve të Ballkanit Perëndimor, “Western Balkans’ 6”, ku merr pjesë edhe Shqipëria dhe vende tjera dhe do të diskutohen projektet konkrete ekonomike të karakterit rajonal, me theks të veçantë në investimet në infrastrukturë, ndërsa të gjitha vendet do të jenë të përfaqësuara në nivel të barabartë. Kjo konferencë vjen pas konferencës së Berlinit, të organizuar nga Kancelarja gjermane, Angela Merkel, me synim nxitjen e bashkëpunimit ekonomik në mes të vendeve të rajonit.
Konferenca “Western Balkans’ 6” po i zhvillon punimet në “Swiss Diamond Hotel”, në Prishtinë.
Në mesin e pjesëmarrësve në konferencë do të jenë ministrat e jashtëm dhe ata të infrastukturës të vendeve të rajonit si dhe Komisioneri i Bashkimit Evropian për Politikë të Fqinjësisë Evropiane dhe Negocim të Zgjerimit, Johanes Han, dhe komisionerja evropiane për transport, Violeta Bulc (përmes një video-mesazhi).
Zëvendëskryeministri i parë dhe ministri i Punëve të Jashtme i Kosovës, Hashim Thaçi, dje në mbledhjen e qeverisë ka njoftuar për takimin “Western Balkans”, ku, tha ai, janë të ftuar ministrat e jashtëm dhe të infrastrukturës të të gjashtë vendeve Ballkanit Perëndimor. “Në këtë takim do të marrin pjesë edhe Komisioneri Hahn, përfaqësues të Komisioneres Bulc si dhe udhëheqësit e Zyrave të Bashkimit Evropian të gjashtë shteteve të Ballkanit Perëndimor. Do të jenë prezentë edhe shefat e zyrave të Këshillit për Bashkëpunim Rajonal, të Bankës Botërore, të Bankës Evropiane për Rindërtim dhe Zhvillim, të Bankës Evropiane për Investime”, tha zëvendëskryeministri Thaçi.
Ai bëri të ditur se ministrat e Infrastrukturës tanimë janë takuar në Bruksel dhe janë pajtuar rreth “Core Network” rrjetin bazë të rrugëve, hekurudhave, rrugëve ujore, porteve dhe aeroporteve që do të ndërtohen apo zgjerohen.
“Shteti i Kosovës është nikoqir i këtij ministeriali. Organizimin e ndihmon edhe Komisioni Evropian. Gjithashtu dëshiroj të theksoj se dokumentet e miratuara do të hyjnë si dokumente zyrtare të Bashkimit Evropian. Ky takim është një bazë e fuqishme që do të merr një mbështetje gjithashtu jashtëzakonisht të madhe edhe në takimin e ardhshëm në Vjenë, që është vazhdimësi e takimit të Berlinit. Të gjitha vendet do të jenë të përfaqësuara në nivel të barabartë dhe formati do të jetë Gymnik”, tha Thaçi.
Ai theksoi se qëllimi është të arrihen marrëveshje të rëndësishme për infrastrukturën e vendeve të Ballkanit Perëndimor. “Besoj se e gjithë kjo do të kalojë parullat politike ditore. Do të jetë një konferencë ku do të dizajnohet thjeshtë e ardhmja infrastrukturore e rajonit për të marrë një kuptim sa më zhvillimor dhe perëndimor evropian”, theksoi zëvendëskryeministri Thaçi.
Konferenca sapo filloi në orën 10:00, ndërsa mediet lejohen të marrin pamje të fjalëve hyrësë të zëvendëskryeministrit të Parë dhe ministrit të Punëve të Jashtme të Kosovës, Hashim Thaçi, dhe Komisionerit të BE-së për Politikë të Fqinjësisë Evropiane dhe Negocim të Zgjerimit, Johanes Han. Konferenca për medie do të mbahet nga ora 12:40 deri në orë n 13:10.
(tesheshi.com)
