Ministri i Jashtëm i Serbisë, Ivica Daçiç, deklaroi në Parlamentin e Beogradit se qeveria e tij nuk do të çojë tekstet shkollore për shqiptarët e Preshevës, që janë përgatitur në Shqipëri dhe Kosovë.
Daçiç, i bëri këto komente në një interpelancë që zhvilloi me deputetin shqiptar në parlamentin serb, Riza Halimi.
“Ju doni që të pranojmë tekstet shkollore nga Kosova apo nga Shqipëria, të cilat thonë që Kosova është e pavarur dhe që shkruajnë se Manastri serb në Deçan është pjesë e dinastive tuaja”?, tha Daçiç.
Debati në Parlament u zhvillua mbi buxhetin për vitin 2016 , ku ministri i Jashtëm u përgjigj mbi të drejtat e shqiptarëve në Luginën e Preshevës.
Daçiç tha se shqiptarët nuk duhet të presin ndihma nga jashtë dhe duhet të zgjidhin çështjet e tyre me shtetin serb.
Ministri i jashtëm serb i është përgjigjur më pas duke thënë se “serbët në Shqipëri kanë 10 herë më pak të drejta se ju, atyre u janë ndryshuar mbiemrat dhe nuk kanë një Këshill Kombëtar si ju”.
/tesheshi.com/
