Nju Jorku duhet të mbajë statujën e Kristofor Kolombit pavarësisht rolit të tij në kolonizimin e dhunshëm të vendasve, gjë që është e pafalshme, tha guvernatori njujorkez Andrew Cuomo.
Cuomo tha se Kolombi është i rëndësishëm për amerikanët italianë sepse simbolizon kontributin e tyre në Nju Jork dhe se ai kështu kundërshton heqjen e statujave.
Protestuesit kanë shkatërruar statuja të Kristofor Kolombit ditëve të fundit, gjatë demonstratave anti-raciste.
I pyetur nga reporterët nëse kishte ardhur koha që ato të hiqen, Cuomo tha: “Absolutisht jo!”.
“Unë i kuptoj ndjenjat për Kristofor Kolombin dhe disa nga veprimet e tij që askush nuk do t’i mbështeste. Megjithatë, statuja përfaqëson dhe nënkupton mirënjohjen për kontributin italo-amerikan në Nju Jork”, tha Cuomo, nipi i emigrantëve italianë.
Kolombi ka qenë subjekt i polemikave për vite me rradhë
Trazirat anti-raciste pas vrasjes së afrikano-amerikanit George Floyd në një operacion policor kanë rinovuar fushatën për të hequr monumentet e Konfederatës dhe simbole të tjera nga epoka koloniale, raportojnë media amerikane.
Monumentet e Kolumbit u shkatërruan në disa vende në Shtetet e Bashkuara.
Një statujë e Kristofor Kolombit mbeti pa kokë në Boston, një tjetër u dëmtua në Miami, një e tretë u hodh në një liqen në Virxhinia, dhe një tjetër u rrëzua në Saint Paul, Minesota.
Studiuesi italianë ka qenë subjekt i polemikave në Shtetet e Bashkuara për vite me rradhë. Detari nga Xhenova i cili është regjistruar historikisht si ai që zbuloi Amerikën, shpesh konsiderohet një nga simbolet e gjenocidit kundër indianëve amerikanë dhe vendasve në përgjithësi.
Dhjetëra qytete amerikane kanë zëvendësuar festimet e Ditës së Kolombit në tetor – e cila u bë një festë në vitin 1937 – me një ditë përkujtimi për “popujt indigjenë”. Megjithatë, as Bostoni dhe Nju Jorku, i cili ka një komunitet të fortë italian, të cilit i kushtohet kjo ditë, nuk e kanë bërë këtë. /tesheshi.com/
