Nga Anila Dushi
Ndërsa në faqen zyrtare të ëeb-it të KQZ-së, cec.org.al klikon dhe njihesh me listat e 50 partive politike të rregjistruara për të qenë pjesë e Këshilit të Bashkisë Shkodër, përballesh me fakte që nuk janë ndeshur më parë.
Kështu, në dy parti të ndryshme, njëra e spektrit të majtë dhe tjetra e djathtë kandidojnë madje në vende me propabilitet fitues, dy bashkëshortë. Bëhet fjalë për çiftin Besim dhe Ilesa Bushaj. Besim Bushaj kryeson listën e Partisë së të Drejtave të Mohuara të Re, duke qenë i pari dhe kështu me mundësi që të jetë fitues.
Ndërsa bashkëshortja e tij, Iljesa Bushaj, është numri 12 në listën e Partisë Socialiste, që ka mundësi të jetë dhe ajo anëtare e Këshillit të Bashkisë Shkodër, pasi dihet se PS është një parti e madhe dhe synon numër të madh këshilltarësh.
Çifti Bushaj duket se është i ndarë në drejtim të bindjeve, pasi Besimi nga Postriba njihet si i djathtë, ku madje në mandatin e kaluar ka qenë anëtar i këshillit të komunës Postribë si përfaqësues i një partie po të djathtë.
Ndërsa bashkëshortja e tij, Iljesa, është vajza e kryetarit aktual të komunës Ana e Malit, Xhevat Mollça, që fitoi në garën e 2011, nën siglën e PS-së dhe vazhdon të jetë aktiv në rradhët e të majtëve.
Në listat e dy partive kryesore nuk mungojnë dhe emra të të afërmve të njerëzve me pushtet në PD dhe PS. Kështu tek PD janë përfshirë në listë gruaja e kryetarit të komunës Postrib, Faz Shabaj, Nadire Shabaj, e cila mban vendin 14, ndërsa bashkëshorti i saj nuk ndodhet në listë.
Po kështu në vendin 22, më me pak mundësi që të jetë anëtare e Këshillit të Bashkisë Shkodër, është Anita Amuli, bashkëshortja e anëtarit aktual në Këshillin e Bashkisë Shkodër, Xhevdet Amuli, drejtues i strukturave të PD-së dhe anëtar kryesie, i cili nuk është në listën e PD-së.
Në PS janë përfshirë në listë vajza e kryetarit të komunës Ana Mali, Iljesa Xhevat Mollça, që mban numrin 12 dhe për të cilën shkruam dhe më lart, si dhe djali i kryetarit të komunës Berdicë, Ervin Besnik Brahimi që mban numrin 15, ndërsa babai i tij fitoi në zgjedhjet e 2011 nën siglën e PS-së.
Gjithashtu tek PS është e pranishme në pjesën fituese me numrin 4, Mirela Halit Mataj, motra e kryetarit aktual të komunës Rrethina, Luan Harusha, përfaqësues i PS-së. Në listën zyrtare të publikuar nga KQZ, Diana Muriqi është e regjistruar në dy parti të ndryshme por të një koalicioni, atë të majtë. Emri i Diana Muriqit ndodhet tek Partia Socialiste në numrin 16, por edhe tek G99.
Në zgjedhjet e 2011, Diana Muriqi hyri në Këshillin Bashkiak nën siglën e G99 por tek G99 listën e kryeson djali i saj, Brian Muriqi. Djali i prefektit Paulin Radovani, Eltoni kryeson listën e LSI-së ndërsa kushëriri i parë i deputetit Agron Çela, Sokol Lekaj është i treti. Tek lista e partisë së të Drejtave të Mohuara e Re, ndër 27 kandidatë të regjistruar, 12 prej tyre janë me mbiemrin Bushaj, dhe jo rastësisht, pasi i përkasin të njëjtit fis nga Postriba.
Ndasitë fetare me apo pa qëllim nuk mund të mungojnë. Partia Lidhja Demokristiane e Shqipërisë të 26 kandidatët i ka të besimit katolik. Ndërsa Lëvizja e Legalitetit i ka të gjithë kandidatët muslimanë. Partia Agrare Ambjentaliste ndër 28 kandidatë ka vetëm një të besimit musliman, ndërsa partia Mendimi i Djathtë Liberal ka vetëm 4 katolikë. Partia Ora e Shqipërisë ka vetëm 4 muslimanë; Lëvizja Demokratike për Ndryshim ka 5 katolikë ndër 26 kandidatë.
Goxhe Gegë Lazri e PSD-së është më e vjetra në moshë që kandidon për Këshillin Bashkiak të Shkodrës e ditëlindjes 01. 05. 1937, pra 78 vjeçe, ndërsa moshën më të re e ka Inri Vatë Staka e PKD, ditëlindja 21. 03. 1997, vetëm 18 vjeçe.
Nga 50 parti të regjistruara në katër KZAZ e Bashkisë Shkodër, 24 prej tyre kanë vetëm nga 26 kandidatë, minimum që sipas lihjit i përjashton nga ndëshkimi me gjobë nga ana e KQZ-së. Nga këto, 6 prej tyre kanë 27 kandidatë, 5 parti janë me nga 28 kandidatë, një me 29 kandidatë, 2 parti me nga 30 kandidatë, një me 31 kandidatë dhe nga një parti me 37 dhe 40 kandidatë. Nga 50 parti vetëm 8 prej tyre kanë plotësuar listën me 51 kandidatë dhe këto janë natyrisht partitë e mëdha si PD, PS, LSI, FRD, PBDNJ, PKD, PSD dhe partia e kandidatit të pavarur për kryetar bashkie në Shkodër, Vullnet Elbasani me siglën LDVMP (Levizja Demokratike për Vlera Mirëqenie Progres). /tesheshi.com/
