Çudirat në politikën shqiptare vazhdojnë, edhe pse pas 18 majit, marrëveshjes mes kryeministrit Edi Rama dhe kreut të PD-së, Lulzim Basha, u shpresua në vendosjen e një standardi të ri.
Por duket se morali nuk ekziston, ndërsa trafiku i deputetëve ka mbetur i njëjtë si në legjislaturat e kaluara.
Pas zgjedhjeve të 25 qershorit, referuar rezultatit të çertifikuar nga KQZ, në Kuvendin e Shqipërisë formoheshin 3 grupe parlamentare: PS, PD dhe LSI. Kjo për faktin se Rregullorja e Kuvendit ka të përcaktuar qartazi se një grup parlamentar mund të regjistrohet vetëm kur ka 7 deputetë.
Por, lojrat politike nuk kanë fund. Ato mund të zhbëjnë rregulloren, ligjin, moralin thjesht dhe vetëm për të ndarë “tepsinë parlamentare”.
Rasti më i fundit është regjistrimi i grupimit parlamentar republikan, parti që zyrtarisht nuk ka asnjë deputet në Kuvend, pasi Fatmir Mediu, megjithëse kryetar i PR-së, ishte pjesë e listës së kandidatëve të PD për qarkun e Tiranës.
Por, kjo nuk e ka penguar Mediun që të “trafikojë” 6 deputetë nga aleati i tij, PD, për të plotësuar numrin e nevojshëm për të formuar grupin parlamentar.
Pjesë e këtij grupi do të jenë Lindita Metaliaj, që do të mbajë funksionin e zv.kryetares, ndërsa anëtarë janë: Nadire Meçorapaj, Hekuran Hoxhalli, Fatbardha Kadiu, Orjola Pampuri dhe Isuf Çelaj.
Kjo lëvizje i jep mundësinë Mediut që të jenë anëtar i Konferencës së Kryetarëve, duke qenë një zë më shumë pro opozitës.
Po çfarë do të ndodhë nëse të njëjtin shembull do të ndjekin edhe Tom Doshi, Nard Ndoka, Vangjel Dule, Dashamir Shehi apo PDIU-ja, e cila ka 3 deputetë dhe i mjaftojnë edhe 4 për të plotësuar numrin 7?
Ndoshta në muajt në vazhdim mund të ndodhë edhe ky skenar, dhe sërisht në Kuvend të funksionojnë një mori grupesh parlamentare fiktive, që krijohen për interesa të momentit dhe nuk pasqyrojnë rezultatin zgjedhor.
Ndoshta, kreu republikan me këtë lëvizje ka thyer çdo rekord në Kuvendin e Shqipërisë, pasi i vetëm arriti të formësojë një grupim parlamentar. /gj.k/ /tesheshi.com/
