Të paritura qesharake në listat e zgjedhësve janë bërë pjesë në proçesin e votimit për kryetarin e ri të komunës së Drenasit në Kosovë. Nuk është hera e parë që ndodhë, që mes të gjallëve renditen edhe emra të vdekurish. Një parregullsi kjo e listave të votimit, që ka ndodhur edhe në proçeset e kaluara të zgjedhjeve në Shqipëri.
Një qytetar, Enver Lulaj ka treguar i befasuar për mediat lokale, pasi që ka parë në listën e votuesve emrin e nënës së tij, megjithëse ajo nuk është në mesin e të gjallëve, prej 6vitesh.
“Kur e pash emrin e nënës reagova. Nëna ka vdekur qe 6 vjet, kjo është e tepërt dhe për atë reagova”, tha Lulaj.
Ai tha se kjo nuk është hera e parë që sheh emrin e nënës së tij në Listën e Votuesve. Madje, sipas tij, në zgjedhjet e fundit e kishte parë dhe “nënshkrimin” e saj, pra duket se dikush ka votuar në emër të saj. Shefqet Bytyqi, menaxher i pikës së votimit në shkollën “Rasim Kiçina”, tha se ky është rasti i parë që dëgjon, kur emri i një të vdekuri gjendet në listë për të votuar.
Por, Bytyqi tha se çështja e pastrimit të listave i takon Komisionit Qendror Zgjedhor (KQZ) dhe jo menaxherëve të qendrave të votimit./tesheshi.com/
