Presidenti amerikan Joe Biden uroi kryeministren e re britanike Liz Truss për marrjen e detyrës, në një bisedë telefonike në të cilën të dy liderët u angazhuan për forcimin e marrëdhënieve të ndërsjellta dhe marrjen e një qëndrimi të përbashkët kundër Rusisë.
Truss dhe Biden folën me telefon të martën pasdite dhe ata mund të takohen tashmë në Asamblenë e Përgjithshme të OKB-së në fund të shtatorit.
Zyra e kryeministres së re britanike njoftoi se Truss dhe Biden diskutuan për forcimin e bashkëpunimit në NATO dhe në marrëveshjen e sigurisë të lidhur vitin e kaluar nga SHBA, Australia dhe Britania për përballjen me Kinën. Truss pret që ajo dhe Presidenti Biden “të punojnë ngushtë së bashku si liderë të demokracive të lira për të adresuar sfidat e përbashkëta, veçanërisht problemet ekstreme ekonomike të shkaktuara nga lufta e Putinit”, tha Downing Street në një deklaratë.
Truss mori postin e kryeministrit në një kohë kur Britania po përballet me sfidat e saj më të mëdha në dekadat e fundit. Të ashtuquajturat marrëdhënie speciale mes Shteteve të Bashkuara dhe Britanisë kanë qenë të forta vitet e fundit, pavarësisht mosmarrëveshjeve mes ish-presidentit amerikan Donald Trump dhe ish-kryeministres britanike Theresa May.
Uashingtoni dhe Londra janë aleatë për të ndihmuar Ukrainën në luftën e saj kundër Rusisë dhe për të kundërshtuar ndikimin kinez në rajonin e Paqësorit. Marrëveshja tregtare dypalëshe, për të cilën disa zyrtarë britanikë kishin shpresuar se mund të zbuste efektet negative të Brexit në tregti dhe ekonomi, ende nuk është materializuar në presidencën e Biden.
Një zyrtar amerikan tha se Shtëpia e Bardhë pret që Truss të vazhdojë politikat e Boris Johnson dhe se Biden dhe Truss mund të jenë aleatë në kundërshtimin e pushtimit rus të Ukrainës dhe ndikimit në rritje të Kinës në rajonin Indo-Paqësor.
Biden shkoi mirë me Johnson, por mund të ketë mosmarrëveshje me Truss për Irlandën e Veriut. Gjatë kohës së saj si deputete, ajo prezantoi legjislacionin që përmbysi Protokollin e Irlandës së Veriut dhe Biden këmbënguli që Britania të mos bënte asgjë për të kërcënuar paqen e një çerek shekulli në Irlandën e Veriut.
Në një deklaratë nga zyra e kryeministrit për bisedën telefonike, theksohet se Truss dhe Biden ranë dakord se është e rëndësishme të ruhet paqja në Irlandën e Veriut. /tesheshi.com/
