E shtuna ka qenë e mbushur me sfida interesante në kampionatet më të mira të Europës, por dy janë më së paku rezultatet ku duhet ndalur që në krye të herës.
Plot nëntë gola janë shënuar në “Goodison Park” të Liverpulit. Në javën e 24-t të kampionatit anglez, Evertoni ka fituar me një rezultat tenistik ndaj Bornmëthit: 6-3! Katër prej golave për vendasit i ka shënuar një lojtar: Romelu Lukaku!
Nuk ka mbetur pas as Napoli në Itali, që në fushën e Bolonjës shkatërron skuadrën vendase. Shpërthyes, napolitanët kanë fituar 1-7, e tani i gëzohen vendit të dytë të përkohshëm në Serinë A. Mertens e Hamsik janë heronjtë, me nga tre gola të shënuar; shifrat plotësohen nga një tjetër golashënues, Insigne.
Në Premier League, Çelsi fitoi dje 3-1 ndaj Arsenalit, në një ndeshje të luajtur pa zemër nga “topçinjtë”. Diferenca mes këtyre dy ekipeve shkoi në 12 pikë; një dorëzim deri diku i Asenalit në luftën për titull.
Shkëputjen e fortë të Çelsit e shmangu në njëfarë mënyre Totenhemi, që fitoi 1-0 ndaj Midëllsbrout. Më tepër se zhgënjyes Liverpuli, që humbet 2-0 ndaj Hall Sitit. Çfarë e shton momentin e keq për Liverpulin është fakti se nuk ka fituar ende një ndeshje në kampionat që prej nisjes së vitit!
Alcacer, Messi dhe Aleix Vidal ishin shënuesit në fitoren 3-0 të Barcelonës ndaj Atletik Bilbaos në La Liga-n spanjolle. Një fitore që e afron me një pikë Barcelonën me Realin e Madridit kryesues. Veçse madrilenët, veç faktit që kanë një ndeshje më pak të luajtur, nuk do ta zhvillojnë as sot takimin në fushën e Selta Vigos, të anuluar për shkak të dëmeve të stuhisë në terrenin sportiv.
Diego Simeone ka provuar dje të hedhë në fushë që nga minuta e parë veteranin Fernando Torres. një vendim që ka rezultuar i drejtë, pasi Atletiko e Madridit ka fituar 2-0 ndaj Leganesit pikërisht me dy gola të Torres-it. Në një tjetër takim, Valencia është mundur thellë në shtëpi, 0-4, nga Eibari. Ku ka përfunduar Valencia!
Shalke 04 ka meritën se dje ndali Bajernin e Mynihut në “Allianz Arena”. Lewandowski dhe Naldo ishin shënuesit në barazimin 1-1, në javën e 19-të të Bundesligës. Pas shtatë fitoresh radhazi në kampionat, ka ardhur kështu dhe frenimi i parë i bavarezëve.
Borusia e Dortmundit është përgjigjur me një fitore 1-0 ndaj Lajpcigut. Një takim i tensionuar nga fillimi gjer në fund. Lajpcigu i vendit të dytë e sheh tani Bajernin kryesues katër pikë larg. Dortmundi i vendit të tretë është goxha tutje; 34 pikë për të karshi 46 pikëve të Bajernit të Mynihut.
Nisa ka përfunduar në vend të tretë në kampionatin francez dje pas humbjes me rivalin e drejtpërdrejtë. Ndërsa kishin kryesuar bashkë, Monako fitoi 3-0 ndaj Nisës, dhe u shkëput me tre pikë në kryesim. PSG-ja mori vendin e dytë me një fitore 1-3 në transfertën ndaj Dizhonit.
Porto – Sporting i Lisbonës, një prej sfidave klasike të futbollit portugez, u mbyll mbrëmë me fitoren 2-1 të skuadrës pritëse. Porto mori vendin e parë në Primeira Liga me këtë fitore, por mund të zbresë në të dytin nëse Benfika fiton sot ndaj Nacionalit.
Në Turqi, në një të tetat e Kupës, ish-ekipi i Cikalleshit, Istanbul Bashakshehiri, ka eliminuar Gallatasarajin. Bashakshehiri, në vend të dytë në Superligën turke, fitoi 2-1 ndaj Gallatasarajit dhe u kualifikua për në çerekfinale. Në të njëjtin aktivitet, sot në mbrëmje pritet me interes njëri prej derbeve të Stambollit: Beshiktash – Fenerbahçe. /tesheshi.com/
