CSKA e Moskës ka fituar mbrëmë finalen e Euroleague-s, duke u shpallur skuadra më e mirë e Europës në basketboll për meshkuj.
Ka qenë një finale që i ka rezervuar emocionet për në fund. Në “Mercedes-Benz Arena” të Berlinit, CSKA e ka mposhtur Fenerbahçen, fuqinë më të re të basketbollit europian, me rezultatin 101-96.
Një takim që ka kërkuar dhe një shtesë pesëminutëshe, pas një barazimi të befasishëm në fund të lojës.
Fenerbahçe ka vuajtur prej emocioneve të një finaleje të parë për të. Një minus për turqit ka qenë paraqitja katastrofike e një prej lojtarëve të saj kyç, çekut Jan Vesely, që në dhjetë gjuajtje të lira arriti të shënonte vetëm një, të fundit prej tyre.
Perioda e dytë qe posaçërisht dërrmuese për Fenerbahçen, që humbet 10-28. Diferenca në dëm të turqve arrin gjer në 21 pikë, duke i bërë ata të duken të dorëzuar.
Por finalja e mbrëmjes të së dielës do ta ruante surprizën për në periodën e katërt, ku Fenerbahçe kalon për herë të parë në epërsi në 20 sekondat efundit, pasi kishte mbyllur një hendek të madh pikësh. Dixon do t’u jepte jetë turqve me trepikëshat e tij.
Barazimi 83-83 do t’i çonte skuadrat në shtesë, ku rusët do të tregoheshin më të saktë, duke e fituar tërë finalen 101-96. Dy-tre vendime të gjyqtarëve qenë të dyshimta në këtë pjesë kritike të lojës, ndërsa ato shkuan në favor të CSKA-së.
Nando de Colo qe shënuesi më i mirë te rusët, me 22 pikë, duke u shpallur dhe lojtari më i vlefshëm, MVP, i Final Four-it.
CSKA-ja e fiton trofeun pas tetë viteve, kurse Fenerbahçes i duhet të presë vitin tjetër për të tentuar përsëri ta fitojë për herë të parë. /tesheshi.com/
