Kampionët e dy sezoneve të fundit të Euroleague-s, Reali i Madridit dhe CSKA-ja e Moskës, u përballën mbrëmë në kryeqytetin spanjoll në kuadër të javës së 16-të të sezonit të rregullt të aktivitetit.
Në një ndeshje me tepër rivalitet, të parët që e patën epërsinë qenë miqtë, që e mbyllën në fitore 23-24 dhjetëminutëshin e parë. Fraksioni i dytë foli për madrilenët, ndërsa i treti qe në ekuilibër. Në fund, fitorja qe e vendasve, që i mposhtën kampionët në fuqi 95-85.
Sergio Llull ishte shënuesi më i mirë i ndeshjes, me 24 pikë.
Kjo qe humbja e tretë radhazi për CSKA-në e Moskës, diçka që nuk ngjiste prej gjashtë vitesh. Moskovitët mbajnë gjithsesi ende vendin e parë, me një seri prej 12 fitoresh e katër humbjesh.
Reali i Madridit është afruar fare pranë kampionëve, me 11 fitore e pesë humbje.
Në të njëjtat shifra, me nga 11 fitore e pesë humbje, janë dhe Baskonia Vitoria Gasteiz dhe Olimpiakos i Pireut. Baskonia fitoi thellë, 102-70, mbrëmjen e së enjtes ndaj Uniks Kazanit, ndërsa Olimpiakosi triumfoi 77-69 në derbin e Athinës ndaj Panathinaikosit. /tesheshi.com/
