Euroleague i ka mësuar tani emrat e dy skuadrave që do ta synojnë në mbarim të këtij sezoni trofeun e saj.
CSKA e Moskës dhe Fenerbahçe do të luajnë mes tyre në mbrëmjen e së dielës për të përcaktuar skuadrën më të mirë europiane të këtij viti në basketboll për meshkuj.
Moskovitët kanë pas tyre një histori suksesi, duke e fituar dhe më herët aktivitetin, edhe pse nuk ia kanë dalë në vitet e fundit.
Përndryshe, Fenerbahçe është për herë të dytë rresht në Final Four, dhe me gjysmëfinalen e fituar mbrëmë është bërë skuadra e parë turke që do ta pretendojë këtë trofe. Në ndryshim nga Efes Pilseni i ca viteve më parë, që synoi të ngjitej deri këtu por nuk ia doli, ama në përbërje i kishte turq një pjesë të mirë të lojtarëve kyç, Fenerbahçe e sotme arriti të ketë sukses, por nuk ka një turk spikatës. Mbrëmë, për shembull, nga tre turqit në stol, asnjëri nuk luajti qoftë dhe për një sekondë të vetme.
Në gjysmëfinalen e parë u përballën dy ekipe ruse, CSKA e Moskës dhe Lokomotiv Kuban i Krasnodarit. Me më shumë përvojë, moskovitët arritën të fitojnë në një ndeshje lineare. Rezultati 88-81 i çoi ata në finale.
Krejt drithëruese qe gjysmëfinalja tjetër, që pati tre akte. Fenerbahçe – Laboral u karakterizua nga një fillim i papërmbajtshëm i turqve, që shënojnë 13 pikët e para të lojës, nga një marrje e kontrollit të lojës me ngadalë nga spanjollët e Laboralit, dhe nga pesë minuta shtesë ku fenerlinjtë rikthehen dhe njëherë te loja e tyre, duke fituar në fund.
E drejtuar mjeshtërisht nga Obradoviç, Fenerbahçe do të kryesonte në pjesën e parë të lojës, edhe pse drejt fundit të saj balanca po merrte nga Laborali. Spanjollët do të kryesonin për herë të parë në nisje të pjesës së dytë, një kryesim i ruajtur gjatë të gjithë këtyre minutave. Një interpretim i gabuar i lojës në çastet e fundit nga Laborali, që kërkon një zgjidhje të panevojshme me një gjuajtje për trepikësh nga Darius Adams, i dalluar gjer atëherë, e çon lojën në shtesë. 72-72 përfundon loja e rregullt.
Turqit kanë një hov të paparë në shtesën prej pesë minutash. Ata shënojnë 16 pikë, kurse spanjollët përgjigjen me vetëm pesë pikë.
Rezultati 88-77 e çon Fenerbahçen në finale! /tesheshi.com/
