Dy ekipet kryesuese në grupet e gjashtëmbëdhjetë skuadrave më të mira të kontinentit në basketboll për meshkuj kanë siguruar dhe fitoret e dyta në seritë e takimeve të playoff-it.
Në “Ulker Sports Arena” të Stambollit, Fenerbahçe ka kryesuar gjatë gjithë ndeshjes ndaj Realit të Madridit, duke mos e vënë për asnjë çast në dyshim fitoren. Skuadra turke nuk njeh humbje prej më tepër se 15 muajsh në fushën e vet, diçka që e ka përsëritur mbrëmë, kur i ka dërrmuar kundërshtarët nga Madridi.
Rezultati përfundimtar i takimit të dytë ka qenë 100-78 në favor të turqve, që kryesojnë 2-0 në serinë e playoff-it. Ndeshja e tretë do të luhet në kryeqytetin spanjoll.
Shumë më i ekuilibruar ka qenë takimi mes CSKA së Moskës dhe Crvena Zvezdës. Rusët dhe serbët janë ndarë në barazim në dhjetëminutëshin e parë, 20-20, ndërsa miqtë kanë kryesuar 24-28 në fraksionin e dytë të lojës.
Dy dhjetëminutëshat e fundit kanë qenë shumë të ekuilibruar, por në fund fitorja u ka buzëqeshur moskovitëve, që ia kanë dalë me një pikë diferencë, 77-76. Kyle Hines shënoi 19 pikë për CSKA-në, kurse më i miri pikashënues te Crvena Zvezda qe Stefan Jovic, me 15 pikë.
Sonte luhen takimet e dyta të përballjeve Laboral – Panathinaikos dhe Lokomotiv Kuban – Barcelona. /tesheshi.com/
