Ish-kryetarja e Dhomës së Përfaqësuesve të SHBA-së, Nancy Pelosi, tha të dielën, më 28 janar, se disa protesta në Shtetet e Bashkuara që kërkojnë një armëpushim në Gaza mund të lidhen me Rusinë dhe se FBI duhet të hetojë se si financohen ato.
Këtë e ka deklaruar Pelosi në një intervistë për CNN amerikan, por nuk ka paraqitur asnjë provë apo argument.
“Thirrja e tyre për një armëpushim është një mesazh nga (Presidenti rus) zoti (Vladimir) Putin… Le të mos tallemi, kjo lidhet drejtpërdrejt me atë që ai do të donte të shihte,” tha Pelosi. “Unë mendoj se disa nga këto protesta janë spontane, të natyrshme dhe të sinqerta. Disa, mendoj se janë të lidhura me Rusinë. Ndaj disa duhet të hetohen dhe unë dua t’i kërkoj FBI-së ta hetojë këtë,” shtoi ajo.
Pelosi është i pari emër nga ligjvënësit e shquar amerikanë që akuzon liderin rus për mbështetjen e protestave amerikane që bëjnë thirrje për armëpushim.
Por duhet theksuar se presidenti aktual i SHBA-së, Joe Biden, i cili e ka nisur tashmë fushatën e tij për rikandidim presidencial, është përballur me situata shumë të pakëndshme kur bëhet fjalë për qytetarët amerikanë me origjinë arabe. Këto ditë, menaxherja e tij e fushatës Julie Chavez Rodríguez vizitoi Michigan-in, ku pati një bojkot të shumë zyrtarëve arabo-amerikanë, duke përfshirë liderët komunalë dhe ligjvënësit e shtetit. Të gjithë ata refuzuan të takoheshin me Julie Chavez Rodriguez, duke pretenduar se nuk do të diskutonin zgjedhjet për sa kohë që civilët vriteshin masivisht në Gaza.
“Është e pakuptueshme që ne të flasim për politikën elektorale ndërkohë që po ndodh gjenocidi,” tha Abdullah Hammoud, kryebashkiaku i Dearbor-nit të Detroit-it.
Në deklaratat për televizionin Al Jazeera, zyrtarët lokalë arabo-amerikanë në Michigan-in juglindor thanë se zgjedhësit e tyre janë të zemëruar dhe të frustruar me politikat e Bidenit në Gaza dhe zemërimi mund të jetë i dëmshëm për shanset e rizgjedhjes së presidentit.
Dearborn – shtëpia e një komuniteti të madh palestinez, libanez, jemenas dhe irakian – njihet si kryeqyteti i “Amerikës Arabe”.
Kryebashkiaku shtoi se komuniteti arab dhe më gjerë në Dearborn ndiheshin të “tradhtuar” nga mbështetja e palëkundur e Bidenit për Izraelin.
Arabo-amerikanët në Dearborn dhe qytete të tjera të Michigan-it mund të luajnë një rol të madh në zgjedhjet presidenciale në SHBA, ku sistemi bazohet në fitoret e shteteve individuale.
Ish-presidenti Donald Trump mundi sfiduesen demokrate Hillary Clinton në shtetin e Midperëndimit me më pak se 11,000 vota në vitin 2016. Ndaj, vlerësohet se qindra mijëra arabo-amerikanë në Michigan mund të ndikojnë në rezultatin e zgjedhjeve.
Në ciklet e fundit zgjedhore, kandidatët presidencialë, veçanërisht demokratët, kanë filluar të pranojnë rëndësinë e votës arabe: ata kanë publikuar reklama në arabisht, janë takuar me përfaqësues të komunitetit dhe kanë trajtuar shqetësimet specifike të qytetarëve arabë në SHBA.
Në vitin 2020, Biden lëshoi një platformë për komunitetet arabo-amerikane, duke u zotuar të njohë barazinë e palestinezëve dhe izraelitëve dhe të mbrojë të drejtat e tyre civile në shtëpi. Ai dërgoi gjithashtu gruan e tij, Jill Biden, dhe zv/presidenten Kamala Harris në Dearborn për të kontaktuar komunitetin arab atje.
Ndërsa përfaqësuesit arabo-amerikanë theksojnë se komunitetet e tyre nuk drejtohen nga një çështje, ata thonë se shkalla e masakrës në Gaza dhe roli i pakompromis i Bidenit në të e bëjnë të vështirë, nëse jo të pamundur, që ata të ripërtërijnë mbështetjen e tyre për 81-vjeçarin.
“Arabët nuk do të votojnë për Joe Biden sido që të jetë. Ata kanë mbaruar me Bidenin,” tha Sam Baydoun, një komisioner i Qarkut Wayne i cili gjithashtu refuzoi të takohej me Chavez Rodriguez.
Administrata Biden vuri veton ndaj dy rezolutave të Këshillit të Sigurimit të Kombeve të Bashkuara që bënin thirrje për një de-përshkallëzimin e sulmeve në Gaza që kanë vrarë më shumë se 26,000 palestinezë.
Financimi për agjencinë e OKB-së për refugjatët palestinezë (UNRWA) gjithashtu u pezullua këto ditë bazuar në pretendimet e pakonfirmuara izraelite se disa punonjës të UNRWA-s morën pjesë në sulmin e Hamasit ndaj Izraelit më 7 tetor.
Abraham Aiyash, udhëheqësi i Dhomës së Përfaqësuesve të Michigan-it, hodhi poshtë pretendimet e Uashingtonit se po përpiqej të ndihmonte popullin e Gazës.
“Përpjekja rezultoi në gati 30,000 vdekje, shkatërrim masiv të infrastrukturës civile dhe trimërim të një qeverie fashiste të ekstremit të djathtë në Izrael. Pra, nëse Shtetet e Bashkuara ‘po përpiqen’, kam frikë të imagjinoj se si do të dukej nëse Shtetet e Bashkuara nuk u përpoqën,” tha Aiyash, i cili është me origjinë jemenase. /tesheshi.com/
