Një gjysmëfinale krejt ndryshe qe menduar ajo në “Santiago Bernabeu” mes Realit dhe Atletikos; pritshmëri e shkatërruar nga Ronaldo, që me një tregolësh thuajse ka rrënuar një ëndërr në radhë të skuadrës së Diego Simeone-s për të fituar trofeun e Champions League-s.
Shihni çfarë i bën Ronaldo Atletikos: më 19 nëntor 2016, në “Vicente Calderon,” në një derbi madrilen për La Ligën, portugezi shënon një tregolësh që i jep fitoren 0-3 Realit.
Vetëm pak muaj më vonë, në të parin takim të gjysmëfinales së Champions-it, tregolëshi i Ronaldo-s vulos fitoren 3-0 të Realit!
Një tregolësh që pason atë ndaj Bajernit të Mynihut, në çerekfinale.
Prej kohësh nuk kishim parë një dominim të tillë të Realit ndaj Atletikos, prej kohësh nuk kishim parë një shkërmoqje të tillë të djemve të Simeone-s.
Sipas përllogaritjes së bërë të ditur nga Eurosport-i, mundësitë e Realit për të shkuar në finale janë 94 për qind!
Nëse diçka ndryshe ndodh pak më shumë se një javë më vonë, nëse Atletiko arrin të bëjë një përmbysje të pamenduar, atëherë kjo do ta linte në hije dhe atë fitore të çmendur të Barcelonës ndaj PSG-së më herët në të njëjtin aktivitet. Ama vështirë të jetë ndokush që mund ta çojë në mendje tani një kualifikim të Atletikos.
Momenti është i Realit, pasi momenti është i Ronaldo-s! /tesheshi.com/
