Ronaldo do të luajë për përfaqësuesen e vendit të tij për herë të parë që prej Europianit të kësaj vere. Ndërsa Portugalia nis përgatitjet për dy takimet e radhës në eliminatoret e Botërorit të Rusisë, Ronaldo është thirrur për të dhënë kontributin e tij.
Portugalia pësoi një humbje shokuese në ndeshjen e parë të këtyre eliminatoreve, duke humbur 2-0 me Zvicrën. Një nisje e keqe kjo për Portugalinë, që tani kërkon të grumbullojë gjashtë pikë në dy takimet.
Ekipi ka nevojë për yllin e Realit të Madridit, edhe pse kundërshtarët e radhës janë dy prej përfaqësueseve më të dobëta në kontinent.
“Ky grup është sigurisht më i fortë me Cristiano Ronaldo-n,” ka deklaruar trajneri i portugezëve, Fernando Santos.
Kampionët e Europës presin Andorrën më 7 tetor, për të luajtur tre ditë më pas në transfertë ndaj Ishujve Faroe. Janë dy takime që premtojnë goleadë, duke patur parasysh se çfarë kundërshtarësh do të ketë përballë Portugalia.
Bashkë me Ronaldo-n, rikthehen në kombëtare dhe Renato Sanches i Bajernit të Mynihut dhe Andre Gomes i Barcelonës, që gjithashtu munguan ndaj Zvicrës po për shkak dëmtimesh. /tesheshi.com/
