Kapiteni i kombëtares portugeze po shijon pushimet tanimë, i përmbushur plotësisht me dy trofetë më të rëndësishëm europianë në futboll të fituar.
Nga lotët e vuajtjes në ato minuta të para të finales së Euro 2016-tës nuk ka mbetur asgjë, e gjithçka është kthyer në një buzëqeshje të pambarim.
Ronaldo do të mungojë në muajin e parë të sezonit të ri për shkak të atij dëmtimi që nuk e la ta luante plotësisht finalen e Europianit, e kështu ka gjetur kohë të merret me sipërmarrjet e tij jashtë futbollit. Gjatë inaugurimit të një hoteli në pronësi të tij, ai ka folur dhe për gazetarët.
“Ky sezon ka qenë më i miri i karrierës sime,” u ka thënë ai atyre. “Kam fituar dy tituj të mëdha me klubin e vendin tim, kështu që ishte diçka unike.”
Ronaldo fitoi me Realin e Madridi trofeun e Champions League-s, të njëmbëdhjetin për klubin. “Ishte një moment shumë emocional, shumë i veçantë,” ka treguar Ronaldo.
Menjëherë më pas, Portugalia do të bënte për herë të parë të tijin trofeun e Kampionatit Europian, ku një meritë të veçantë do të kishte dhe 31-vjeçari.
Ai tani është pretendent për ta fituar Topin e Artë për këtë vit, por pohon se nuk e ka mendjen të ngulitur te fitimi i këtij çmimi.
“Nuk e vras mendjen në kam një mundësi për ta fituar atë. Këtë vit kam fituar tashmë Europianin dhe Champions League-n; të dy janë trofe shumë të rëndësishëm.”
Pavarësisht asaj çka thotë, Ronaldo është nga ata lojtarë që kanë gjithmonë uri për të fituar trofe. Ai do të mungojë në nisje të sezonit, por më pas të gjithë do të shohin të njëjtin Ronaldo, atë të pandalshmin në fushë.” /tesheshi.com/
