Nga Nada Dosti, Ankara
Kohët e fundit na paska nderuar me prezencën e saj, aktivistja e mirënjohur për çështjet e ambientit, Greta Thunberg, e cila ka vizituar Dijarbakërin, qyteti me numrin më të madhë të popullsisë kurde (pas Stambollit). Gjatë qëndrimit të saj në qytetin në fjalë, ajo vizitoi dhe një radio të vjetër (Amed) e cila u mbyll nga qeveria pasi shpërndante propagandë pro-armenase kundër qeverisë dhe pasi nuk arriti të paguajë gjobën për shkelje të rregullores rreth çështjes turko-armenase. Ajo më pas vizitoi edhe bashkinë dikur e udhëhequr nga partiakët kurdë të Barazisë dhe Demokracisë së Popullit, të cilët tashmë janë përkohësisht zëvëndësuar me funksionarë qeveritarë.
Pas vizitës ajo publikoi një postim në profilin e saj X ku e quan krahinën juglindore të Turqisë me emrin “Kurdistani verior”:
“Kohët e fundit kam udhëtuar nëpër Kurdistanin verior dhe jam takuar me kurdë nga të gjitha llojet e prejardhjeve. Ata treguan histori të panumërta të shtypjes dhe diskriminimit sistematik me të cilin përballen, veçanërisht nga shteti turk, si dhe historinë e tyre plot masakra”(!).
Greta nuk harron të shtojë edhe dy-tre fjalë rreth çështjes së ambientit sa për të mos dalë krejtësisht jashtë kontekstit për atë që njihet. “Shkatërrimi dhe shfrytëzimi i natyrës, si prerjet e paligjshme të pyjeve, sakrifikimi i zonave për kompanitë e minierave dhe zjarret, është një nga mjetet e shumta të përdorura si pjesë e sulmeve të vazhdueshme kundër kurdëve. Kjo shpesh çon në shkatërrim të komuniteteve lokale dhe biodiversitetit, si dhe zhvendosje të detyruar.”
Më pas ajo shton se “fshirja e kulturës dhe identitetit, dhuna shtetërore, të burgosurit politikë, shpërnguljet e detyruara, ekocidet dhe zhdukjet janë vetëm disa shembuj të diskriminimit me të cilin njerëzit përballen në baza të përditshme, si dhe të mohimit të së drejtës për vetëvendosje dhe liri.
Për të ndërtuar ura të vërteta solidariteti në Turqi, autonomia dhe vetëqeverisja për rajonet kurde janë thelbësore. Populli kurd meriton të drejtën për të formësuar jetën, kulturën dhe komunitetet e veta.
Turqia duhet të qartësojë qëndrimin e saj ndaj kurdëve dhe grupeve të tjera minoritare duke përfshirë të drejtat e tyre në kushtetutë. Qeveria vazhdon të përdorë ‘terrorizmin’ si pretekst për të mbyllur gojën kundërshtarëve të saj politikë. Dhjetëra mijëra individë politikisht aktivë mbeten të burgosur pa gjykime të drejta. Organizatat ndërkombëtare si ECHR, OKB dhe Amnesty [International] e kanë dënuar këtë dhe bëjnë thirrje për lirimin e tyre.
Për një paqe të qëndrueshme dhe një të ardhme të drejtë, e drejta e kurdëve për liri dhe autonomi duhet të respektohet dhe sulmet e dhunshme kundër Kurdistanit duhet të përfundojnë.
Askush nuk është i lirë derisa të gjithë të jenë të lirë.
Bijî Kurdistan (Rroftë Kurdistani)!”
Postimi në fjalë ka nxitur debate dhe ka shqetësuar shumë përdorues, ndërsa në mediat turke ky veprim është komentuar me frazën e veçuar: “Tashmë edhe Greta në safet (rradhët) e organizatës terroriste PKK”.
Edhe më herët, konkretisht në vitin 2022, Greta Thunberg ka shpërndarë një foto me aktivistë duke valëvitur flamurin e tyre të pretenduar. Jo më larg se para një muaji e pak, më 24 tetor, militantë të organiztës terroriste PKK vranë së paku pesë veta dhe plagosën të tjerë, në një sulm në mes të Ankarasë.
Mirëpo para disa muajsh ajo u duartrokit dhe u vlerësua veçanërisht nga komunitetet muslimane nëpër botë për shkak të ngritjes së zërit ndaj çështjes palestineze, duke veshur një kufijeh (shallin tradicional palestinez) dhe duke zbritur në protesta kundër gjenocidit mbi popullin palestinez.
Po përse na pëlqen aktivizmi i saj kur bëhet fjalë për çështjen palestineze ndërsa na shqetëson kur merret me çështjen kurde?
Në pamje të parë të dyja duken çështje të drejtash njeriu, por ndryshimi qendron në faktin se me përkrahjen e grupeve terroriste kurde, si një e huaj, që aq më tepër nuk jeton në Turqi, ajo ndërhyn në çështjet e brendshme të një shteti dhe një kombi. Ndërsa çështja palestineze është çështje universale që nuk lidhet me një parti apo etni të caktuar, por lidhet me njerëzillëkun dhe një komb që po përballet me gjenocid. /tesheshi.com/
