Presidenti egjiptian Abdel Fattah el-Sisi po viziton Katarin të martën, udhëtimi i tij i parë në shtetin e Gjirit që nga viti 2017, kur Kajro së bashku me tre shtete të Gjirit ndërprenë marrëdhëniet diplomatike me Dohën.
El-Sisi është planifikuar të takohet me Emirin e Katarit Sheikh Tamim bin Hamed Al Thani gjatë vizitës dy-ditore, gati tre muaj pasi të dy udhëheqësit zhvilluan bisedime në Kajro me qëllim përmirësimin e marrëdhënieve midis dy vendeve.
Egjipti dhe Katari rivendosën marrëdhëniet diplomatike në janar 2021 pas nënshkrimit të një marrëveshjeje në Al-Ula, Arabia Saudite. Përveç Kajros, ku emiri i Katarit udhëtoi në qershor, të dy liderët janë takuar disa herë këtë vit në kuadër të samiteve të ndryshme.
Al Thani dhe El-Sisi pritet të diskutojnë marrëdhëniet dypalëshe, duke përfshirë përmirësimin e tyre dhe mundësitë e investimeve.
Në vitin 2017, Egjipti së bashku me Arabinë Saudite, Emiratet e Bashkuara Arabe dhe Bahreinin ndërprenë marrëdhëniet diplomatike me Katarin, duke e akuzuar atë për ndërhyrje në punët e brendshme dhe mbështetje të “terrorizmit” në rajon. Doha mohoi akuzat dhe akuzoi katër vende për rrethimin ekonomik dhe politik të Katarit.
Pasi marrëdhëniet u rivendosën vitin e kaluar, Katari dhe Egjipti kanë pasur disa vizita të ndërsjellta dhe marrëveshje dypalëshe. Ata i kthyen ambasadorët dhe ranë dakord për të vendosur një fluturim direkt mes dy vendeve, për herë të parë që nga viti 2017.
Kur Izraeli sulmoi Gazën në gusht, Egjipti dhe Kajro nxituan të ndërmjetësojnë një armëpushim.
Investimet e Katarit
Në qershor, sipas presidencës egjiptiane, emiri i Katarit “lavdëroi përpjekjet e Egjiptit për të rindërtuar Rripin e Gaza-s”.
Doha dhe Kajro, aleatët kryesorë të SHBA-së në Lindjen e Mesme, kanë siguruar fonde për rindërtimin e enklavës palestineze dhe po kërkojnë të ndërmjetësojnë mes Izraelit dhe Hamasit, i cili qeveris Gazën.
Rreth 350,000 egjiptianë punojnë në Katar dhe dërgojnë në shtëpi qindra miliona dollarë në vit.
Sulmi i Rusisë ndaj Ukrainës thelloi krizën ushqimore të Egjiptit dhe ndikoi në çmimet globale të ushqimit dhe eksportet e miellit.
Duke kërkuar të nxisë ekonominë e tij, Egjipti nënshkroi marrëveshje investimi me vlerë pesë miliardë dollarë gjatë vizitës së ministrit të Jashtëm të Katarit, Sheikh Mohammed bin Abdulrahman bin Jassim Al Thani në Kajro në mars.
Vëzhguesit pohojnë se Katari do të investojë pesë miliardë dollarë në vitet e ardhshme, të cilat do të kontribuojnë në zhvillimin ekonomik të Egjiptit, rritjen e punësimit dhe inkurajimin e investimeve private të Katarit në atë vend. /tesheshi.com/
