Ç’po ndodh në tregun botëror të “arit të zi”?

Në tregjet botërore, çmimet e naftës u rritën edhe javën e kaluar, pas një rënie të theksuar në gjysmën e parë të vitit, sepse, pavarësisht ngadalësimit të rritjes ekonomike, kërkesa për “arin e zi” është ende relativisht e fortë.

Çmimi i një fuçie në tregun e Londrës u rrit javën e kaluar me 4,7 për qind, në 78,47 dollarë, ndërsa në tregun amerikan, një fuçi u rrit me 4,5 për qind, në 73,86 dollarë. Edhe pse rritja e ekonomive më të mëdha në botë po ngadalësohet, e po ashtu edhe konsumi, kërkesa për “arin e zi” është ende pak më e lartë se sa pritej.

Kështu, të dhënat e javës së kaluar të qeverisë amerikane treguan se stoqet e naftës bruto ranë me 1.5 milionë fuçi javën e kaluar në SHBA, më shumë se sa pritej, duke treguar kërkesë solide.

Nga ana tjetër, furnizimi është i kufizuar. Organizata e Vendeve Eksportuese të Naftës (OPEC) dhe aleatët e saj janë ende duke zbatuar një marrëveshje për të ulur prodhimin këtë vit, dhe Arabia Saudite ka thënë se do të ulë prodhimin me një milion fuçi të tjera në ditë në korrik. Kjo do të thotë se prodhimi i OPEC+ është ulur me një total prej rreth pesë milionë fuçi në ditë ose rreth pesë për qind të kërkesës botërore.

“Reduktimi i prodhimit të OPEC+ do të forcojë marrëdhëniet midis ofertës dhe kërkesës në treg, kështu që në gjysmën e dytë të vitit mund të ketë mungesë oferte, e cila do të mbështeste çmimet e naftës,” shkruajnë analistët e Morningstar në rishikimin e tyre të tregut.

Lëvizjet e çmimeve sigurisht që do të varen nga kërkesa. Dhe kërkesa me sa duket do të dobësohet më tej. Ekonomia kineze, importuesi më i madh i naftës në botë, nuk po rimëkëmbet aq shpejt sa pritej pas heqjes së masave kufizuese për COVID.

Ekonomia perëndimore, nga ana tjetër, do të dobësohet më tej, sepse Fed Amerikan dhe Banka Qendrore Evropiane ka shumë të ngjarë të vazhdojnë të rrisin normat e interesit për të shtypur inflacionin. Pavarësisht rritjes së çmimit të naftës për dy javë rresht, ato janë ende në të kuqe në krahasim me fillimin e vitit, me rreth tetë për qind. /tesheshi.com/