Duket si e çuditshme që LSI-ja të ketë qëndrime të ndryshme për çështje të rëndësishme politike në vend brenda saj. Ndaj përbën lajm. Po, po, ka disa ditë që në radhët e partisë së Ilir Metës, që sot drejtohet nga Monika Kryemadhi, janë vënë re në sipërfaqë qëndrime të ndryshme politike me qendrën.
Ndërsa Kryemadhi e ka rënduar gjuhën kundër qeverisë dhe ka lidhur një pakt me PD-në e Lulzim Bashës, deputetë të LSI-së kanë qenë jo në unision me këtë politikë. Dhe nuk bëhet fjalë për qëndrime periferike, pasi është fjala për dy ish-ministra të LSI-së në qeverinë e Edi Ramës.
Klajda Gjosha, ish-ministre e Integrimit, dhe Nasip Naço, ish-ministër i Drejtësisë, janë përplasur me PD-në, pikërisht partinë që Kryemadhi e ka vizituar dy herë personalisht, nga ku ka shpallur betejën për “një qeveri antimafia”. Nasip Naço, gjatë diskutimit në liidhje me buxhetin e shtetit u përplas me kreun e grupit parlamentar të PD-së, Edmond Spaho, në lidhje me konçensionet. Naço tha se ka qenë PD-ja ajo që shkeli ligjin në konçensionet që dha kur ishte në qeveri.
“Deklaroj publikisht se 2013-2015 nuk kam dhënë asnjë koncesion. Ligjin e keni shkelur ju”, tha Naço duke ju drejtuar PD-së.
Por deputeti i LSI-së nuk u ndal me kaq, pasi i rikujtoi deputetit demokrat Edmond Spaho, se gjatë kohës që Partia Demokratike ka qeverisur, kjo forcë, sipas tij ka abuzuar me buxhetin pasi ka dhënë koncesione të shumta abuzive.
“S’e kam harruar asnjëherë që kam punuar në të dyja qeveritë. E përbashkëta ka qenë zbatimi i ligjit në të dyja rastet. Çështja e koncesioneve është çështje që diskutohet shumë, por shumë e thjeshtë për t’u kuptuar. Kush e ka riskun? Riskun e kanë kompanitë koncesionare. Risku në rastin e qeverisë suaj e ka marrë gjithmonë buxheti dhe ky quhet tender dhe në tender ka procedura të tjera”, u shpreh Naço.
Kurse Klajda Gjosha ka kundërshtuar qëndrimin e PD-së në Parlament duke bojkotuar komisionet. Sipas Gjoshës, ky është një qëndrim jo normal. Gjatë një prononcimi për një media jashtë ambienteve të Kuvendit, Gjosha duke u ndalur tek fronti opozitar dhe braktisja e komisioneve nga ana e PD-së, u shpreh se lufta e LSI është brenda institucioneve dhe jo jashtë. Madje Gjosha theksoi se opozitën e bën më të fortë qëndresa sesa bojkotimi, siç bën Partia Demokratike.
“Unë di të them që lufta e LSI me këtë qeveri bëhet brenda institucioneve. Kjo është bota demokratike, kështu duhet të funksionojë dhe besoj që kjo opozitën e bën më të fortë se largimi nga institucionet”, u shpreh Gjosha.
Deri tani është paksa e mistershme që ky qëndrim i Naços dhe Gjoshës vjen si nismë individuale, apo është strategji e qendrës për të dualizuar betejën politike. Fakt është se si Naço, ashtu edhe Gjosha nuk janë të preferuarit e Monika Kryemadhit në lidershipin e LSI-së. Ajo nuk ka marrë ish-ministrat si bashkëpunëtorë të ngushtë të saj, por trupën drejtuese të LRI-së, ku ka më shumë ndikim. Nuk është e rastësishme që në postet më të larta si Sekretar i Përgjithshëm dhe nënkryetar i LSI-së, u zgjodhën dy studentë të rinj që ende nuk kanë përfunduar studimet, duke mënjanuar kështu ish-ministrat.
Kjo frymë është ndjerë edhe në Konventën e fundit që Kryemadhi thirri dy javë më parë për të testuar mbështetësit e LSI-së që janë ende me punë në administratë. Por sa ky qëndrim i ndryshëm mund të kthehet në përplasje brenda LSI-së? Kjo duhet pritur në votime të rëndësishme në Kuvend.
Me rastin e votës për Gramoz Ruçin, votim që ishte i fshehtë dhe që mund të kishte rrjedhje nga opozita, Kryemadhi e tërhoqi të gjithë grupin në bojkot. Ka pasur shenja për një votim ndryshe? Nuk përjashtohet, përderisa edhe nga PD-ja dy deputetë votuan pro Ruçit. Vetë Edi Rama duket ka informacion, përderisa e “mikloi” Nasim Naçon gjatë seancës së Kuvendit.
“Doja të ndërhyja për të replikuar me profesorin tim të dashur, por na u fut Nasipi në mes. Nasip rri i qetë, ke bërë gjënë e duhur, s’ishte nevoja të mundoheshe, ji krenar për kohën që kemi punuar bashkë. Unë e di që ti je krenar, por thuaje Nasip”, tha Rama.
Pas kësaj fraze LSI ka pasur një mbledhje grupi, ku është folur pikërisht për qëndrimet e kësaj force politike në Kuvend. Fjala kyçe ka qenë “disipline”. /tesheshi.com/
