Pas kufizimit të moderimit të përmbajtjes, themeluesi i Meta-s, Mark Zuckerberg, ka shpjeguar arsyet përse po i jep fund politikave të përfshirjes në kompaninë e tij. Në një intervistë të gjatë në podcast-in e Joe Rogan, i njohur për mbështetjen e tij ndaj Donald Trump, Zuckerberg ndau pikëpamjet e tij për ndryshimet kulturore dhe korporative.
“Energjia mashkullore mendoj se është pozitive,” tha ai. “Shoqëria ka shumë përfitime prej saj, por më duket se kultura korporative po përpiqet të distancohet prej kësaj. Të gjitha format e energjisë kanë vlerën e tyre, dhe besoj se një kulturë që feston njëfarë agresiviteti mund të ketë përfitime reale.”
Komentet e Zuckerbergut që mund të duken si diçka e thënë nga një YouTuber maskilist, reflektojnë pikëpamjet e tij personale mbi një ndryshim kulturor në Meta. Ai shtoi se interesimi i tij për artet marciale e ka ndihmuar të kuptojë dhe të vlerësojë “një kulturë më mashkullore.”
Ndërkohë, përtej retorikës dhe klisheve, Zuckerberg ka bërë edhe një hap konkret: ka vendosur të heqë politikat e diversitetit, barazisë dhe përfshirjes (DEI) në burimet njerëzore të Meta-s. Në një memo të brendshme, të publikuar nga New York Times dhe Axios, Meta shpjegoi se termi “DEI” ka marrë një ngarkesë negative, duke u interpretuar nga disa si një praktikë që favorizon grupe të caktuara në dëm të të tjerëve.
Zuckerberg justifikoi këtë vendim duke iu referuar edhe ndryshimeve në peizazhin ligjor të SHBA-së, veçanërisht një vendimi të fundit të Gjykatës së Lartë që ndalon praktikat e caktuara të preferencave të bazuara në diversitet. /Tesheshi.com/
