Gjysmë milion njerëz infektohen me koronavirus çdo ditë vetëm në qytetin kinez Qingdao, tha një zyrtar komunal i shëndetësisë, duke sugjeruar në një artikull që u censurua shpejt, pasi statistikat zyrtare nuk pasqyrojnë valën e paprecedentë të infeksioneve me të cilat po përballet vendi.
Në fillim të dhjetorit, mes zemërimit në rritje të publikut, Kina pa paralajmërim i dha fund shumicës së masave të rrepta shëndetësore të politikës së saj “zero Covid”, të cilën e kishte zbatuar me zell që nga viti 2020, duke hequr karantinat e kushtueshme dhe kufizimet e udhëtimit që patën ndikim të rëndësishëm në ekonominë kineze.
Që atëherë, rastet e Covid në Kinë kanë shpërthyer dhe një pjesë e madhe e popullsisë është lënë në duart e veta, në një kohë kur ilaçet kundër temperaturës dhe vetë-testet janë në mungesë për shkak të rritjes eksponenciale të kërkesës.
Në të gjithë vendin, qytetet po përpiqen të përballen me një rritje të infeksioneve që ka zbrazur raftet e farmacive dhe mbushur repartet e spitaleve, ndërsa ka kontribuar në një grumbullim të dukshëm në krematoriume.
Por përfundimi i ndjekjes së detyrueshme të rasteve e bën jashtëzakonisht të vështirë, në mos të pamundur, llogaritjen e numrit të rasteve, ndërkohë që autoritetet kanë ndryshuar metodologjinë e tyre për regjistrimin e infeksioneve. Tani e tutje, vetëm personat, vdekja e të cilëve i atribuohet drejtpërdrejt dështimit të frymëmarrjes të lidhur me Covid-19, përfshihen në statistika. Kjo është një metodologji që synon, sipas ekspertëve, të ulë numrin e vdekjeve që i atribuohen pandemisë.
Por në qytetin lindor kinez të Qingdao, një media e drejtuar nga Partia Komuniste të premten citoi zyrtarin komunal të shëndetësisë të thoshte se qyteti port kishte regjistruar “midis 490,000 dhe 530,000» raste të reja në ditë.
Ky qytet me rreth 10 milionë banorë është “në një periudhë transmetimi të shpejtë, përpara se të afrohet kulmin”, tha Bo Tao, sipas artikullit, duke shtuar se shkalla e infeksioneve pritet të rritet me 10 për qind gjatë fundjavës.
Shkrimi u ribotua nga media të tjera, por mëngjesin e sotëm ai ishte ndryshuar për të hequr numrat.
Ministria kineze e Shëndetësisë raportoi sot se dje, të premten, janë regjistruar 4103 infeksione të reja në të gjithë vendin, pa asnjë vdekje të re.
Në Shandong, provinca në të cilën ndodhet Qingdao, autoritetet regjistruan zyrtarisht vetëm 31 raste të reja lokale. /tesheshi.com/
