Tjetër rënie drastike e numrit të të infektuarve është regjistruar në 24 orë në Shqipëri; vetëm 7 sosh. Kujtojmë që rënia me madhe është regjistruar rreth 2 javë më parë me 6 infektime në 24 orë, por që më pas pati një ngritje duke shkuar deri në 34 në 24 orë – rekordi i deritanishëm në 6 javë masa izoluese – për t’u pasuar nga një tjetër ulje ditë pas dite.
Në deklaratën e përditshme të Ministrisë së Shëndetësisë, u tha:
“Nga rezultatet e testimeve në 24 orët e fundit janë konfirmuar 7 raste pozitive me COVID19, nga të cilat 3 raste janë në Krujë, 2 raste në Tiranë dhe 2 raste në Shkodër.
Gjatë 24 orëve të fundit janë testuar 225 persona të dyshuar me COVID-19.
Deri në këto momente janë testuar 8253 raste të dyshuara dhe prej tyre janë të konfirmuar pozitivë me COVID-19, 773 raste.
Gjatë 24 orëve të fundit, 15 pacientë të tjerë i janë shtuar listës së të shëruarve, duke e çuar totalin e të shëruarve nga COVID-19 në 470.
Aktualisht në vendin tonë janë 272 pacientët aktivë me COVID19 dhe siç shihet numri i të shëruarve vazhdon të jetë më i lartë prej më shumë se dy javësh”.
Nga ana tjetër, ministrja Manastirrliu tha në parlament se infeksioni është ende aktiv. “Jemi ende në një fazë aktive të epidemisë, ku aktualisht kemi 272 persona aktivë të prekur nga COVID19 dhe po bëhet një punë shumë e madhe për të ndërprerë zinxhirin e transmetimit të infeksioni”.
“Sot konstatojmë shpërthime në vatra familjare, janë më shumë se 100 vatra dhe po bëhet një punë e madhe për të ndërprerë zinxhirin e transmetimit të infeksionit. Është një punë shumë e madhe që po bëhet nga mjekët, infermierët, epidemiologët në terren”, sqaroi Manastirliu.
E sipas saj, hapja e pritshme duhet të jetë tejet e kujdesshme. /tesheshi.com/
