Eshtë kthyer sërish shifra kulmore e të infektuarve në Shqipëri – ajo prej 29 të prekurish në 24 orë, një kulm që u takon datës 4 prill. Ç’prej asaj dite e deri më sot vijoi një ulje, por që sërish është prekur si kuotë, e kjo jo për shkak të vatrës më të re, asaj të Krujës, ku ka një ulje prej 7 të infektuarish, por të shfaqes së virusit në një burg të Tiranës (nuk specifikohet nëse te 313 apo 302).
“Nga rezultatet e testimeve janë konfirmuar 29 raste pozitive me COVID-19, mes të cilëve një personel shëndetësor, e vetëizoluar në shtëpi.
Nga rastet e reja të 24 orëve të fundit, 20 janë në Tiranës, nga të cilat 13 i përkasin një vatre në një institucion të vuajtjes së dënimit, ku po vijon hetimi epidemiologjik, pas zbulimit të rastit të parë. 7 raste pozitivë janë në Krujë dhe 2 raste në Shkodër.
Edhe pse ka një rritje të numrit të rasteve sot, ato janë të lokalizuara në dy vatra që po monitorohen dhe ndiqen me shumë vëmendje nga epidemiologët në terren”, deklaroi Dr. Rovena Daja nga Instituti i Shëndetit Publik.
Ndër lajmet pozitive u veçua:
“Rezulton se deri tani Berati, Lezha, Mirdita, Rrogozhina dhe Tropoja janë zona ku të gjithë të prekurit deri tani, janë të shëruar.
Aktualisht në vendin tonë janë 251 persona të infektuar aktivë dhe siç shihet numri i të shëruarve është më i lartë. Kjo tendencë tashmë vazhdon të jetë e qëndrueshme”. /tesheshi.com/
