Listës së gjatë të atyre emrave publikë që COVID u ka marrë jetën, i është shtuar së fundi Guljem Radoja, ndër aktorët më të njohur të teatrit, por më shumë të kinemasë shqiptare, me një galeri të jashtëzakonshme rolesh.
Artisti durrsak ishte shtruar ditët e fundit te “Shefqet Ndroqi”, pas njëe agravimi të gjendjes shëndetësore si pasojë e COVID-it, por nuk ka arritut t’ja hedhë kësaj flame globale.
E fundit vdekje tronditëse COVID ndër artistë, ishte ajo e kantautorit Kujtim Prodani, te të 50-at. Ndërsa Radoja ishte 76 vjeç.
Ai lindi në 2 korrik të vitit 1945 në Shkodër. Pas përfundimeve studimeve të larta në Institutin e Lartë të Arteve (sot Akademia e Arteve) për Dramaturgji në vitin 1972, fillon punën si aktor profesionist në Teatrin e Librazhdit. Më pas largohet nga ky teatër për të punuar si aktor dhe regjisor pranë Teatrit “Bylis” të qytetit të Fierit dhe më pas si aktor në Teatrin “Aleksandër Moisiu” në Durrës.
Në kinematografi ai ka luajtur më shumë se 30 role. Roli i i tij i parë ishte ai i inxhinierit të pyjeve në filmin “Gjurma” në vitin 1970. Më tej do të vazhdonin një sërë rolesh të tjera si roli i Tenente Gruabardhit në filmin “Në fillim te verës” në vitin 1975, roli i Stefan Bardhit në filmin “Mësonjëtorja” në vitin 1979, roli i Petro Nini Luarasit në filmin “Kush vdes në këmbë” në vitin 1984, roli i priftit në filmin “Kthimi i ushtrisë së vdekur” në vitin 1989, roli i prokurorit në filmin “Kolonel Bunker” në vitin 1998, rolin e Safet Saraçit te “Gëzhoja e Vjetër” etj.
Por më pikanti i tij, si rol dhe negativ, ishte ai i italianit Alberto te “Gjeneral Gramafoni”.
Për meritat e tij artistike Guljelm Radoja është nderuar me titullin “Artist i Merituar”. /tesheshi.com/
