Presidenti i Federatës Botërore të Futbollit (FIFA), Gianni Infantino, tha se Kupa e Botës në Katar në 2022 do të luhet me stadiumet plot.
Infantino foli në një konferencë shtypi në Gjenevë të organizuar nga Drejtori i Përgjithshëm i Organizatës Botërore të Shëndetësisë (OBSH) Tedros Adhanom Ghebreyesus.
I pyetur nga gazetarët nëse do të kishte tifozë në stadiume në ndeshjet e Kupës së Botës, Infantino u përgjigj: “Ne do të kemi stadiume të plota. Deri atëherë, COVID-19 do të mundet ose ne do të mësojmë të jetojmë me të.”
“Ne do të kthehemi atje ku duhet të jemi”, shtoi Infantino.
Futbollistët, jo një përparësi për vaksinën
Kupa e Botës në Katar do të mbahet nga 21 nëntor deri më 18 dhjetor 2022.
Infantino shtoi se ai nuk mendon se futbollistët duhet të jenë në grupet prioritare për marrjen e vaksinës kundër COVID-19.
“Prioriteti i vaksinave janë, sigurisht, njerëzit e rrezikuar dhe punëtorët shëndetësorë. Kjo është shumë e qartë në mendjen tonë. Ne nuk i konsiderojmë futbollistët një grup prioritar në këtë drejtim”, tha ai.
Infantino i bëri thirrje komunitetit ndërkombëtar për të siguruar një fushë të barabartë loje në aksesin ndaj vaksinave, trajtimeve dhe testeve diagnostike në të gjithë botën. /tesheshi.com/
