Miroslav Tugjman, djali i Franjo Tugjmanit, presidenti i parë i Kroacisë së pavarur, vdiq në moshën 75 vjeç nga COVID-i. Në Bosnje ky nuk ka qenë thjesht një lajm telegrafik.
Për boshnjakët, ai ishte një kriminel, porsi i ati, në raport me synimet ndaj Bosnjes në kohën e luftës. 
Sipas boshnjakëve, Miroslav Tugjman konceptoi dhe drejtoi agresionin kroat në Bosnjë. Si themelues dhe drejtor i ombrellës së shërbimit inteligjent kroat HIS, ai ishte i përfshirë në çdo detaj të krijimit dhe përpjekjeve për të krijuar të ashtuquajturën “Herceg Bosna”.
Gjithashtu, pas përfundimit të agresionit në Bosnje, Miroslav Tugjman bëri gjithçka për të fshehur gjurmët e krimeve kroate. Ai kurrë nuk hoqi dorë nga pretendimi për “Herceg Bosna”-n dhe të gjitha vitet e pasluftës punoi për ringjalljen e saj.
Thuhet se pas përfundimit të luftës, Miroslav Tugjman, përmes intervistave dhe librave të tij, akuzoi boshnjakët për terrorizëm, trilloi gënjeshtra për të ndjerin Alija Izetbegoviç dhe mohoi vendimet përfundimtare të Tribunalit të Hagës.
Si ish-kreu i Shërbimit të Inteligjencës Ushtarake, thuhet se Gjeneral Major Miroslav Tudjman e mbajti këtë pozitë të rëndësishme në kohën e dëbimit masiv të popullsisë lokale në Herzegovinën jugperëndimore. Dhjetëra njerëz u vranë në kampet e përqendrimit të ngritura nga forcat kroate, me njohurinë dhe pëlqimin e plotë të protagonistëve të një politike të tillë. Thuhet madje se ato kampe ishin afër shkallës së krimeve të palës serbe. /tesheshi.com/
