Nuk është në fakt vetëm mosmarrja pjesë në zgjedhjet e 18 qershorit që po e penalizon Lulzim Bashën në një shizmë më të madhe në kohë për të djathtën shqiptare, ndoshta edhe më e madhe se ajo që ndodhi tek e majta me themelimin e LSI-së.
Gjithçka ka nisur herët, katër vjet më parë kur Basha u instalua në ish-zyrën e vjetër të Berishës në ish-selinë që tani çelësat i ka Bamir Topi. Gara me të ndjerin Sokol Olldashi shkaktoi një plagë të madhe të brendshme dhe e ndau partinë në dy pjesë. Kjo pasi u dyshuar për manipulik procesi nëpërmjet identifikimit të fletëve, çka solli një përplasje të brendshme.
Listat u panë me lupë nga ish-sekretari i përgjithshëm i qeverisë, Gjergj Lezhja, i cili arriti të identifikojë se kush janë “armiqtë” e Bashës dhe njeherësh votuesit e Olldashit. Situata u bë aq e nderë brenda tashmë SHQUP-it, sa ky i fundit paralajmëroi se do të flasë përballë Blendi Fevziut gjithë këto gjëra.
Por Olldashi, vetëm dy ditë përpara se do të shpallte identifikimin dhe ndëshkimin e votuesve pro tij, humbi jetën në një aksident automobilistik.
Prej asaj kohe, Lulzim Basha thuajse shkriu të gjitha degët e PD-së në rrethe dhe i komandoi ata ose me deputetë ose me njerëz nga partitë e tjera.
Rasti më simbolik është Himara, ku Basha largoi Kristo Çipën dhe e zëvendësoi me një ushtar të Vangjel Dules në mënyrë që ta rikthejë Himarën në prehrin e PBDNJ-së. Por degët u shkrinë kudo, Durrësi në radhë të parë ku u hoqën dy kryetarë: Igli Cara që është deputet dhe Osman Metalla.
Ndërkaq në Dibër para zgjedhjeve të pjesshme u shkri e gjithë dega, ku kryetari i saj, ish-deputeti Rrahim Kaleci tashmë ka kaluar në radhët e LSI-së. Ndërsa ish-deputeti Fatos Hoxha kandidon në Kukës për PDIU-në. Të njëjtën parti përqafoi edhe Mesila Doda kur u largua nga PD pas përplasjes me Bashën.
Siç duket kjo hemoragji ka sjellë një tendencë politike çka normalisht pritet ta avantazhojë si LSI-në ashtu edhe PDIU-në që do të marrin më 18 qershor pjesë të rëndësishme të fetës që kanë votuar për PD-në. Ndaj këtu e ka origjinën edhe shantazhi i saponisur i ish-kryeministrit Berisha ndaj Ilir Metës, duke e kërcënuar se do të publikojë video të tjera.
Thelbi qëndron në rrudhjen e mëtejshme të PD-së në zgjedhje, e cila synon që me mosmarrjen pjesë në 18 qershor të ndikojë nëpërmjet numrit të votuesve që të krijojë një balancë politike për pas zgjedhjeve. Dhe situata duket mjaft dramatike për PD-në.
Sepse nëse vëmë re listën e të gjithë të larguarve apo oponentëve të Bashës, thuajse një për një janë përkrahësit dhe votuesit e të ndjerit Sokol Olldashi për kryetar, që nga Mesila Doda, Majlinda Bregu, Astrit Patozi, Igli Cara etj. E nëse i shton edhe një emër të rëndësishëm që është shumë simbolik, atë të Jozefina Topallit, gjendja bëhet edhe më serioze.
Por Lulzim Basha, duket e ka ditur dhe me dashje ka ndikuar në mbytjen e zërave ndryshe për të krijuar një “Republikë të Re” brenda Shqip-it, që të mos ketë askund dhe asnjë shenjë të Sokol Olldashit. Dhe tani duhet të marrë përsipër pasojat, pasi të larguarit padyshim nuk janë vetëm por kanë ndjekësit e tyre. /tesheshi.com/
