Duket se raporteve delikate mes Greqisë dhe Shqipërisë iu është shtuar së fundi dhe sheshi “Skënderbej”, më saktë vendosja aty e pllakave të gurit të ardhura nga të gjitha trevat shqiptare, përfshirë dhe Çamërinë. Dhe pikërisht për këtë të fundit, ka reaguar së fundi zyrtarisht Ministria e Jashtme greke me anë të një deklarate.
“Ne dënojmë vendosjen në sheshin kryesor të rinovuar të Tiranës, të gurëve që vijnë nga zona të ndryshme të Ballkanit, duke përfshirë edhe zonën greke të Filatit”, thuhet në deklaratën e Athinës zyrtare.
“Këto gurë, në të cilët janë gdhendur emrat e zonave të prejardhjes së tyre, kompozojnë atë vepër që simbolizon ‘bashkimin e trojeve shqiptare’, dhe është e qartë pse bëhet fjalë: për një veprim qeveritar që kultivon dhe fsheh irredentizmin”, vijon më tej deklarata, ku thuhet se “kjo është një tjetër sfidë nga Qeveria shqiptare, e cila minon marrëdhëniet e fqinjësisë së mirë”.
“Ministria e Jashtme greke ka bërë dhe po bën të gjitha veprimet e nevojshme, duke informuar miqtë, partnerët dhe organizatat ndërkombëtare. E duke respektuar procesin zgjedhor në shtetin fqinj, nuk kemi dorëzuar deri tani asnjë njoftim publik, që mund të keqkuptohej dhe të keqinterpretohej si ndërhyrje në procesin zgjedhor.Kjo nuk do të thotë se ajo do të tolerojë sjelljet që janë në kundërshtim me frymën europiane të bashkëjetesës paqësore dhe të bashkëpunimit, duke u shkelur në mënyrë flagrante parimet themelore të respektimit të marrëdhënieve të mira fqinjësore, si një nga kushtet kryesore për kursin europian të Tiranës. Për fat të keq, ende qëndrime të rrezikshme dhe të vjetëruara të shekullit të kaluar minojnë progresin dhe prosperitetin e rajonit, e krijojnë një barrierë të gurtë ndaj të ardhmes europiane të Shqipërisë”, përfundon deklarata e Ministrisë së Jashtme greke. Gjithë ç’po ndodh është në vazhdën e një acarimi të raporteve mes Athinës dhe Tiranës zyrtare, nisur që me ardhjen në qeverisje të Edi Ramës, i cili nga ana e tij ndryshoi qasje ndaj fqinjit jugor duke përmbysur një model 25-vjeçar mes dy vendeve, ku Shqipëria kishte një pozicion vasaliteti. Dhe kjo ndodhi ndërsa në disa treva shqiptare të rajonit, ekzistonte miti se Edi Rama është grek! /tesheshi.com/
