Trajneri i Tottenham, Antonio Conte, kritikoi ashpër arbitrimin pasi VAR-i anuloi golin e fitores së Spurs kundër Sportingut në minutën e shtatë të shtesës i cili do t’i kishte siguruar klubit londinez kalimin në fazën e 16-të të Ligës së Kampionëve.
Pas një drame të madhe, Tottenham dhe Sporting barazuan 1:1 në 90 minuta. Mysafirët kaluan në epërsi në minutën e 22-të me golin e Marcus Edwards dhe Rodrigo Bentancur barazoi në minutën e 80-të pas goditjes nga këndi të Ivan Perišiç.
Në minutën e pestë të shtesës, Harry Kane shënoi gol për 2:1, por pas gati tre minutash video analizë, goli u anulua për shkak të pozicionit jashtë loje. Nëse ai do të pranohej, Tottenham do të kishte siguruar raundin e 16-të. Kështu, vendimi u shty për në xhiron e fundit, në të cilën të katër skuadrat e Grupit D mund të kalojnë përpara.
Duke qenë se Conte nuk ishte dakord me vendimin e arbitrit, ai fitoi një karton të kuq për shkak të protestës. Më pas, edhe pas ndeshjes, ai vazhdoi të sulmonte arbitrat, ndaj pritet që UEFA ta ndëshkojë përsëri.
“VAR shkakton shumë dëme”
“Ata e anuluan golin tonë të rregullt. Arbitri në një situatë të tillë duhet të tregojë më shumë inteligjencë”, tha Conte i mërzitur dukshëm pas ndeshjes.
“Topi ishte para Kane dhe goli është gol. Nuk e kuptoj VAR-in, linjën që ata vendosin. Është shumë e vështirë të komentosh këtë vendim, sepse VAR-i shkakton shumë dëme”, ka thënë Conte. “Natyrisht që ne jemi të pafat me VAR. A do të ketë VAR guximin të mos lejojë një gol të rregullt për një klub më të madh në një lojë të rëndësishme? Më vjen keq, por nuk shoh sinqeritet në vendime të tilla”.
Në xhiron e fundit Tottenhami luan kundër Marsejës në Francë, ndërsa në ndeshjen e dytë takohen Sporting dhe Eintracht. Përpara xhiros së fundit, Tottenham kryeson me tetë pikë, Sporting dhe Eintracht kanë nga shtatë, dhe Marseille gjashtë pikë. /tesheshi.com/
