Qeveria italiane është e gatshme të ndërhyjë, nëse është e nevojshme, sepse masat e aprovuara deri më tani nuk janë të mjaftueshme për të mbështetur kompanitë dhe familjet e ndjeshme ndaj përhapjes së infeksionit koronavirus, tha kryeministri italian Giuseppe Conte, vendi i të cilit është shndërruar në “Kinë” të Europës.
Në një intervistë me të përditshmen Corriere della Sera, ai paralajmëroi që dëmet e shkaktuara nga pandemia do të ishin serioze dhe se do të ishte i nevojshëm një “plan i vërtetë rindërtimi”.
“Pas koronavirusit, asgjë nuk do të jetë si më parë. Do të na duhet të ulemi dhe të rishikojmë rregullat e tregtisë dhe tregut të lirë”, tha Conte.
Italia, pas Kinës, është vendi më i prekshëm në botë kur bëhet fjalë për përhapjen e infeksionit dhe që nuk ka shenja të ngadalësimit deri më tani.
Qeveria italiane planifikon të sigurojë mbështetje ekonomike me vlerë afro 25 miliardë euro, ndërsa pritet një mbledhje e kabinetit “Conte” në të cilën pritet të miratohen masa të reja mbështetëse për kompanitë dhe familjet.
Conte theksoi se Italia po i përgjigjet rregullave që do t’i lejojnë ekonomisë italiane të përballojë koston e një emergjence.
Sipas tij, në Itali nuk planifikohen kufizime të mëtejshme, por është e rëndësishme të respektohen ato që janë vendosur tashmë.
Javën e kaluar, autoritetet italiane vendosën kufizime të tilla si mbyllja e shkollave, dyqaneve dhe ngjarjeve sportive, si dhe një urdhër që banorët të qëndrojnë në shtëpi.
Conte vuri në dukje se shkencëtarët thanë se përhapja e infeksionit ende nuk ka arritur kulmin dhe se javët në vijim mund të ishin më të rënda, ndaj dhe duhej të bëhej kujdes maksimal. /tesheshi.com/
