Investigimi: Rreth 3 mijë reklama targetuan të paktën 10 milionë amerikanë, kryesisht në Michigan dhe Wiscons, ku fitorja e Trump ishte e diskutueshme…
Një numër reklamash të lidhura me Rusinë shënjestruan specifikisht Michigan-in dhe Wisconsin-in, dy shtete të rëndësishme për fitoren e Donald Trump-it nëntorin e kaluar, sipas katër burimeve me njohuri të drejtpërdrejtë të situatës.
Disa nga reklamat ruse u dukën mjaft të sofistikuara në shënjestrimin e grupeve kryesore demografike në zonat e shteteve që rezultuan të jenë të rëndësishme, thanë dy nga burimet. Reklamat përdorën një varg mesazhesh përçarëse që synonin të thyenin rrëmujën e reklamave të fushatës online, duke përfshirë promovimin e mesazheve anti-muslimane, thanë burimet.
Deri më tani është e paqartë se cilat rajone të vendit janë shënjestruar nga reklamat. Dhe ndërsa një burim tha se një numër i madh i reklamave u shfaqën në zonat e vendit, të cilat nuk u kontestuan rëndë në zgjedhje, disa qartë ishin përshtatur për të lëkundur opinionin publik në fushëbetejën më të kontestueshme.
Michigan dëshmoi garën më të ngushtë presidenciale në vend. Trump mundi kandidatin demokrate Hillary Clinton me rreth 10,700 vota nga gati 4.8 milion fletëvotime të hedhura. Wisconsin ishte gjithashtu një nga shtetet me rezultatet më të ngushta, dhe Trump fitoi atje vetëm rreth 22,700 vota. Të dy shtetet, në të cilat Trump ishte përpara me më pak se 1%, ishin çelësi i fitores së tij në Kolegjin Zgjedhor.
Burimet nuk e specifikuan se kur në vitin 2016, u zhvilluan reklamat në Miçigan dhe Wisconsin.
Si pjesë e hetimeve të tyre, edhe këshilltari i posaçëm Robert Mueller edhe komisionet e kongresit po kërkojnë të përcaktojnë nëse rusët kanë marrë ndonjë ndihmë nga bashkëpunëtorët e Trump në lidhje me targetimin e reklamave.
Zyrtarët e Shtëpisë së Bardhë nuk u mundën të kontaktoheshin në lidhje me këtë histori.
Presidenti dhe zyrtarët e lartë të Shtëpisë së Bardhë kanë insistuar prej kohësh se nuk ka pasur kurrë ndonjë marrëveshje me Rusinë dhe Trump spretendon se kjo çështje është një “mashtrim”.
Fokusi në Miçigan dhe Wisconsin gjithashtu shton edhe më tepër dëshmi se grupi rus, i lidhur me këtë përpjekje, po përdorte një gamë të gjerë taktikash që potencialisht kishin për qëllim ndërhyrjen në zgjedhje.
Facebook më parë ka pranuar se rreth një e katërta e 3,000 reklamave të blera nga Rusia ishin në shënjestër në vende të veçanta gjeografike, pa detajuar lokacionet. Kompania tha se reklamat që ishin me shënjestër gjeografike “u vunë më tepër në lëvizje në 2015 se 2016.”
Në total, Facebook vlerëson se e gjithë përpjekja ruse u pa nga 10 milionë njerëz.
Adam Schiff, përfaqësuesi demokrat në Komitetitn e Inteligjencës, i tha CNN-së se paneli ishte ende duke vlerësuar shpërndarjen e plotë gjeografike të reklamave ruse dhe nëse kishte ndonjë ndihmë nga individët e lidhur me fushatën Trump.
“Natyrisht, ne po shohim secilën nga shënjestrimet e reklamave, si dhe çdo përpjekje për të publikuar lajme të rreme apo llogari negative kundër Hillary Clinton, për të parë nëse ato demonstrojnë një sofistikim që do të ishte i papajtueshëm me të mospaturit akses në analizat e të dhënave nga fushata,”- tha Schiff të martën në mbrëmje.
Një person me njohuri të drejtpërdrejtë të çështjes tha se disa nga reklamat kishin për qëllim arritjen e votuesve, të cilët mund të jenë të prekshëm ndaj mesazheve anti-muslimane, madje duke sugjeruar që myslimanët të ishin kërcënim për mënyrën e jetesës së Amerikës. Mesazhe të tilla me sa duket mund t’u bëjnë thirrje votuesve të tërhequr nga qëndrimi i ashpër i Trumpit, kundër imigracionit dhe thirrjeve për të ndaluar hyrjen e muslimanëve në Shtetet e Bashkuara.
Schiff tha se komiteti po planifikon hetimin e reklamave që sugjeronin se muslimanët mbështetën Clintonin dhe se si ato ishin përshtatur për njerëzit që kishin kërkuar online për Vëllazërinë Muslimane dhe tema të tjera që sugjeronin se ishin kritikë ndaj Islamit.
Reklamat ishin pjesë e rreth 3,000 reklamave që Facebook i dorëzoi hetuesve të Kongresit këtë javë si pjesë e kërkesave të shumëta të Capitol Hill në lidhje me përfshirjen e Rusisë në zgjedhjet e 2016-ës.
CNN raportoi javën e kaluar se të paktën një nga reklamat e Facebook të blera nga rusët gjatë fushatës presidenciale të vitit 2016 i referohej “Black Lives Matter” dhe ishte një shënjestër në mënyrë specifike për të arritur audiencat në Ferguson, Misuri dhe Baltimore.
Ligjbërësit kanë filluar të vlerësojnë fushëveprimin e të dhënave dhe burimet nga të dyja palët thanë se 3,000 reklama preknin një sërë temash polarizimi, duke përfshirë Amendamentin e Dytë dhe çështjet e të drejtave civile. Reklamat kishin për qëllim të ndikonte votat dhe të mbillte pakënaqësi mes elektoratit, thanë burimet.
Anëtarët e të dyja partive thanë se kishte një sofistikim të qartë në fushatën e reklamave ruse dhe ata thanë se sapo kishin filluar të mësonin shtrirjen e plotë të përpjekjeve në mediat sociale.
“Është në përputhje me gjithçka tjetër që kemi parë në aspektin e masave aktive ruse – një kombinim i cyber-it, i propagandës dhe i mediave të paguara dhe sociale”, tha senatori John Cornyn, republikani nr. 2, i cili është pjesë jo vetëm në Inteligjencën e Senatit, por edhe në panelet gjyqësore, të cilat morën reklamat nga Facebook. “Pra, ne po shohim vetëm majën e ajsbergut.” /tesheshi.com/
