Kohët e fundit, në terren ka pasur një ngërç të dukshëm në luftën që Rusia po bën kundër Ukrainës, në kuptimin që frontet mes dy palëve nuk po lëvizin dhe asnjëra prej tyre nuk ka bërë ndonjë përparim domethënës.
Megjithatë, sulmet e ashpra të kryera nga rusët, qofshin me raketa, aeroplanë, apo edhe me dronë, i inkurajuan aleatët e Ukrainës që t’i përgjigjen një prej kërkesave të para të saj, domethënë t’i siguronin sistemet e mbrojtjes ajrore, kryesisht sistemi amerikan Patriot.
Zyrtarët amerikanë njoftuan të martën se Uashingtoni po finalizonte planet për dërgimin e raketave Patriot në Ukrainë.
Ata shtuan se Uashingtoni mund të njoftojë dërgimin e raketave Patriot në Ukrainë këtë javë, duke vënë në dukje se raketat pritet të dorëzohen së shpejti në ditët në vijim, ndërsa ukrainasit do të trajnohen në përdorimin e tyre në një bazë ushtarake amerikane në Gjermani.
Sa efektiv është sistemi amerikan në zmbrapsjen e sulmeve me raketa dhe avionë rusë?
Versioni i fundit i Patriot PAC-3 është një sistem i mbrojtjes ajrore tokë-ajër. Ai është i pajisur me një lëshues që mban 16 raketa, së bashku me një mjet radar dhe një dhomë kontrolli. Ai lëshon raketa me rreze veprimi deri në 70 kilometra dhe arrin një lartësi maksimale prej 24 kilometrash.
Një sistem radari me bazë tokësore zbulon dhe gjurmon një objektiv brenda një rrezeje prej 80 kilometrash dhe lëshon një raketë Patriot në objektiv për ta shkatërruar atë përpara se të arrijë destinacionin e tij. Raketa është e pajisur me një sistem drejtimi dhe korrigjimi të trajektores, dhe ka aftësinë për të kapur dhe shkatërruar raketa balistike dhe lundruese dhe disa lloje avionësh.
Sistemi Patriot, për të cilin zyrtarët amerikanë thonë se punon për të siguruar hapësirën ajrore të vendeve të NATO-s, ndodhet në Evropën Lindore, duke përfshirë Rumaninë dhe Poloninë. Sistemi gjendet edhe në vende të tjera evropiane si Gjermania, Holanda dhe Spanja.
Mediat amerikane raportojnë se Patriot mund të mbërrijë së shpejti në Ukrainë, por përfshirja e tij në luftime mund të kërkojë më shumë kohë, pasi është e nevojshme të trajnohen ukrainasit se si ta përdorin atë, gjë që, sipas tyre, kërkon muaj. /tesheshi.com/
