Fatmir Mediu, i cili zakonisht e çuditërisht ftohet në studio vetëm për aspekte gjeopolitike, ndonëse nuk gëzon asnjë lloj tagri për të trajtuar çështje të komplikuara të botës në marrëdhënie ndërkombëtare, pasi nuk është specialitet i tij, ka renditur shtyllat kryesore të Partisë Republikane, kryetar i cilës është, trashëguar nga i ndjeri Sabri Godo.
Në përvjetorin e kësaj force, gati të harruar se ekziston, falë pikërisht Mediut, ky i fundit rendit bazat e PR-së, të cilat paradoksalisht asnjëherë nuk i trajton në ligjërimin e tij politik.
“Partia Republikane është partia që në programin e saj ka besimin në Zot si baza e besimit tek vetja, tek liritë dhe të drejtat e individit, si baza e një shoqërie të lirë dhe demokratike”, thotë Mediu, por nuk dihet ndonjë rast që të jetë ftuar në studio e të ketë folur mbi rolin e besimit fetar në shoqëri.
“Partia Republikane është partia e cila beson tek prona private si baza e ndërtimit të ekonomisë dhe lumturisë e mirëqenies familjare”.
Megjithatë, kjo çështje i përket së shkuarës, nisjes së pluralizmit dhe ndryshimit të regjimit në Shqipëri. Pra, nuk ka më ç’diskutohet e kjo prej 35 vitesh.
Vijmë të tjetra:
“Partia Republikane ka luftuar kundër grabitjes së pronës private pronarëve të ligjshëm me ligjin famëkeq 7501 e ligje të tjera leniniste që kanë krijuar padrejtësinë më të madhe të demokracisë dhe një kalvar vuajtjesh pa fund të shqiptarëve dhe ndikuar në largimin masiv të tyre nga Shqipëria”, thotë Mediu. Por këtë ligj, Shqipëria e ka peshqesh në radhë të parë prej PD-së, pra, partisë me të cilën ai ka qenë gjithnjë në aleancë e madje ka qenë ministër në qeverisjen e saj. Dhe nuk dihet që Mediu t’i jetë hakërryer ndonjëherë Berishës apo t’i ketë bërë presion atij për ta zhbërë 7501-shin famëkeq. /tesheshi.com/
