Fredi Beleri i ka dhënë dhe pak dimension fetar burgimit të tij, në intervistën e radhës së dhënë nga qelia, duke thënë se çdo mëngjes zgjohet me Virgjëreshën Mari, ndryshe Merjemen në Islam, gruan më të vyer në historinë njerëzore, nënën e Jezuit ose Isait në Islam.
“Zgjohem në mëngjes dhe shoh para meje imazhin e Virgjëreshës Mari. Për tridhjetë vjet që jam marrë me politikë, doja t’u shërbeja të drejtave të grekëve të Vorio Epirit. Ne nuk kemi të drejta, jemi larg asaj që ne e quajmë ‘shteti i së drejtës’ dhe unë do të luftoj për to në Parlamentin Europian”, ka thënë njeriu mbi të cilin rëndon akuza si vrasës shqiptarësh në emër të Vorio Epirit, pra, si një ndër autorët e masakrës së Peshkëpisë në vitin 1994, kur një komando greke sulmoi një repart kufitar shqiptar, duke vrarë dhe dy ushtarakë.
Në intervistën e dhënë për median greke, Beleri ka tentuar që të nxjerrë si të persekutuar entikë pjesëtarët e minoritetit grek, njëherësh duke pretenduar se Himara është minoritare.
“Himara dhe të drejtat e himariotëve është një çështje që shqetëson shumë njerëz. Jam rritur në Himarë, është një vend që të gjithë e duam. Ka racizëm dhe diskriminim. Ne kur shkojmë në një dyqan dhe të kërkojmë ujë ata të na pyesin ‘pse flisni greqisht?’”, ka thënë Beleri, duke mos e sqaruar se kush janë “ata”.
“Himarra ka fituar njohje. Më në fund kemi arritur të dëgjohemi si minoritet grek në Shqipëri pas shumë vitesh”, ka vijuar ai, duke përfshirë në llomotitjet e tij dhe Erdoganin.
“Erdogan është mentori i Ramës. Dhe në disa gjëra, si rrëmbimi i pronave të grekëve ai e ka tejkaluar… Pronat tona të konfiskuara nga regjimi komunist në Shqipëri nuk na u kthyen pas rënies së komunizmit”, ka thënë Beleri. /tesheshi.com/
