Ironia e fatit e ka sjellë që testi politik i 2016-ës të zhvillohet në një datë që përbën një kataklizmo të freskët nga historia e botës, pasi mendja të shkon te 11 shtatori i tmerrshëm i 2001-shit me shkërmoqjen e Kullave Binjake në Nju Jork e sulmin mbi Pentagopn, me pasojë vdekjen e 3 mijë njerëzve.
Në rastin konkret të politikës shqiptare, “dy kullat” janë dy frymë politike: Edi Rama dhe Lulzim Basha.
Njëri apo tjetri do të pësojnë goditje të fuqishme politike nëse humbasin testin politik të votave në bashkinë e madhe të Dibrës, e cila përfshin një larushi krahinash dhe mentalitetesh, por edhe përfaqësimi politik.
Po le të analizojmë të dy variantet, që, nëse humb PS-ja apo PD-ja në Dibër se cilat do të ishin pasojat e thjeshta politike.
Nëse humb PS-ja…
PS po luan dy beteja në Dibër, atë të kandidatit dhe atë të parties: Edi Rama, bashkë me të deleguarin “ad-hoc” në Dibër, Damian Gjiknurin.
Edhe pse nuk e thotë hapur, PS synon që të paktën të ruajë primatin si parti që ta quajë “fitore” më 12 shtator.
Të dyja rezultatet janë të rëndësishme, por një humbje e PS-së në Dibër në situatën aktuale do t’i ulte pikët e qeverisë “Rama” e cila ndodhet në sulm të egër jo thjesht nga opozita por nga aleati i tij-“armik”, Ilir Meta, i cili i ka lënë Ramës që të shijojë fitoren i vetëm dhe të gëlltisë humbjen po në vetmi, po ndodhi kjo e fundit.
Në stinën e re politike, Rama do të prekte fillimin e fundit të zenithit të tij politik që arriti me zgjedhjet e 2013-s dhe 2015-ës.
Kërkesat për qeveri teknike apo për ribërje kabineti sipas të gjitha gjasave do të bëhen të përditshme, deri në një përplasje finale që do ta çonte Ramën në zgjedhjet e 2017-ës në pozicion mbrojtës dhe të pafavorizuar. Aleatët do të dyzoheshin dhe Ben Blushi sipas të gjitha gjasave do ta fajësojë si shkaktarin e rrëzimit të imazhit socialist nëpërmjet Rilindjes që e kontenston vazhdimisht.
Nga grupi parlamentar do të nxirrnin krye të pakënaqurit nga ndarja e posteve dhe në PS, sipas të gjitha gjasave do të niste një proces i ri. Me një fjalë hyn në zgjedhjet e përgjithshme si humbës.
Nëse humb PD-ja…
Nëse do të humbë Partia Demokratike, atëherë Lulzim Basha do të shënojë në rekordin politik të drejtimit të opozitës humbjen e dytë, pasi të dyja zgjedhjet i ka kërkuar si ballafaqim politik.
Basha, zgjedhjet lokale të 21 qershorit 2015 i konceptoi jo zi zgjedhje të kryetarëve të 61 bashkive të reja por si një votë kundër qeverisë.
Në fund tha se votat ishin blerë dhe trafikuar. Edhe në Dibër mund të ndodhë një gjë e tillë, por ndryshe nga Partia Socialiste, PD po synon të fitojë kandidatin sesa të marrë vota si subjekt politik. Por nëse humbet, atëherë kundërshtarët e brendshëm që nga Eduard Selami, Majlinda Bregu e Astrit Patosi, pra olldashistët dhe rebelët e rinj, do të kërkojnë një katharsis të ri brenda PD-së.
Një pjesë do të kërkojnë rikthimin e Doktorit që ende ka fuqinë dhe joshjen për të tërhequr militantët, kurse pjesa tjetër do të bëjnë thirrje për zgjedhje më të ndryshme se ato ndërmjet Lulzim Bashës dhe Sokol Olldashit. /tesheshi.com/
