Presidenti Thaçi, në muajt e fundit në vazhdimësi ka kritikuar me tone të ashpra ndërkombëtarët, në veçanti Bashkimit Evropian për mos heqje të vizave për Kosovën, duke e cilësuar si të padrejtë vendosjen e kushtit të ratifikimit të Demarkacionit të kufirit me Malin e Zi.
Ai ka shkuar aq larg sa ka thënë se një qasje e tillë e Brukselit ndikon në luhatjen e besimit që qytetarët e Kosovës e kanë në Komisionin Evropian.
Përveç kësaj së fundmi, Thaçi i cili vite më parë kritikonte Vetëvendosje-n për armiqësi me ambasadorët e ngarkuar me punë në Prishtinë, tashmë vet ka armiqësuar raportet me një prej ambasaorëve më të rëndësishën, britanikun Ruairi O’Conell me të cilin mezi i shtrijnë dorën njëri-tjetrit, kjo pas braktisjes që i bëri ky i fundit Thaçit, teksa presidenti shpërtheu me akuza ndaj ndërkombëtarëve duke thënë se Gjykata Speciale ju imponua Kosovës për të kënaqur Serbinë e Rusinë.
Këto deklarata dhe ky ndërrim kursi i Thaçit ndaj ndërkombëtarëve, po shihet me sy të ndryshëm nga njohës të rrethanave politike.
Politologu Mentor Tahiri i arsyeton deklaratat e Thaçit duke thënë se institucionet vendimmarrëse të BE-se vazhdojnë të jenë mjaft të ashpra me Kosovën sa i përket vizave.
Sipas tij, Kosova duhet të kryejë “detyrat” e saj, megjithatë mendon se klasa politike që është në pushtet nuk e ka prioritet thyerjen e izolimit.
“Në njerën anë përfaqësues ndërkombëtarë po kritikojnë qeverinë e Kosovës për mospërmbushje të kritereve për liberaliz im të vizave, kurse në anën tjetër po flirtojnë me qeverinë. Presidenti në këtë aspekt po bën kritika shumë korekte dhe përmbajtësore, ai duket se ka dalluar gjithashtu që disa veprime të ambasadorëve në Kosovë nuk janë në koordinim me administratat e tyre. Nē gjithë këtë konstalacion nuk duhet harruar se roli i Presidentit në disa çështje si ajo e liberalizimit të vizave është mjaft konstruktiv dhe aspak bllokuese”, thotë Tahiri për tesheshi.com.
Faik Krasniqi, njohës i rrethanave politike thotë se sjellja e Thaçit ndaj BE-së, po tregon për modelin e një politikani të pasinqertë e joserioz.
“Presidenti Thaçi ose ka frikë që do të akuzohet nga Gjykata Speciale, ose dëshiron që para popullit ta luaj rolin e viktimës se gjoja është ‘mashtruar’ nga ndërkombëtarët në lidhje me liberalizimin e vizave dhe ‘premtimeve’ tjera që i kanë bërë. Por këto përplasje të tij me ndërkombëtarët nuk do të kalojnë pa pasoja për të, por kam frikë edhe izolim të mëtutjeshëm për qytetarët e Kosovës”, thotë Krasniqi për tesheshi.com.
Kujtojmë se Thaçi qysh më 2009 ka premtuar heqjen e vizave, por edhe pas tetë vitesh Kosova mbetet vendi më i izoluar në Evropë dhe lëvizjet e kosovarëve nëpër vendet e BE-së iu nënshtrohen procedurave të gjata dhe të vështira të marrjes së vizave. Përderisa edhe perspektiva integruese e Kosovës në BE, mbetet ende e paqartë, ngaqë pesë shtete anëtare të BE-së, nuk e njohin atë si shtet. /tesheshi.com/
