Han Kang është bërë fituese e çmimit “Man Booker International” për vitin 2016 me librin e saj “Vegjetariania”. Romani i autores koreanojugore flet për një grua që vendos të kthehet në vegjetariane, e për mënyrën se si ky vendim ndikon në tërë marrëdhëniet e saj me njerëzit që e rrethojnë.
Autorja 45-vjeçare është e suksesshme tanimë në Korenë e Jugut, sukses që e arrin dhe në nivel ndërkombëtar me fitimin e këtij çmimi.
Ky është viti i parë që çmimi “Man Booker International” jepet për një libër të vetëm, e jo për një korpus librash, siç është në traditën e tij.
Gjithashtu ky është viti i parë që çmimi i jepet njëkohësisht dhe përkthyeses, Deborah Smith. Një 28-vjeçare, ajo nisi ta mësojë gjuhën koreane vetëm pak vite më parë, përpara se t’i hynte përkthimit.
Iniciativa e saj për ta mësuar këtë gjuhë mori krah kur ajo pa se mungonin përkthyesit në këtë fushë. Edhe pse më parë nuk kishte mësuar ndonjë gjuhë tjetër të huaj, ajo nuk ngurroi të zhvendosej për në Korenë e Jugut për ta realizuar qëllimin e saj.
“Ky është libri i parë që kam përkthyer, dhe gjëja më e mirë që mund t’i ndodhë një përkthyesi sapo më ka ndodhur mua,” është shprehur ajo.
Vlera monetare e çmimit, 72.000 dollarë, do të ndahet mes autores koreanojugore dhe përkthyeses britanike.
Pena të njohura të letërsisë botërore, si Orhan Pamuk e Elena Ferrante, kanë qenë mes pretendentëve për ta fituar këtë çmim. /tesheshi.com/
