Eshtë shpresuar shumë, është folur shumë, e thuajse ka qenë gati festa për çmimin Oscar të dhënë për filmin “Shok” në kategorinë e filmave të shkurtër.
Por nuk ka ndodhur kështu. Në ceremoninë e dhënies së çmimeve Oscar, të zhvilluar në Los Anxheles, për filmat e shkurtër është shpallur fitues “Stutterer”.
Një film kosovaro-britanik, “Shok” tregon historinë e dy djemve gjatë luftës së Kosovës, duke shpërfaqur realitetin e asaj kohe. Ai është i pari film shqiptar i nominuar për çmimet Oscar. Pritshmëria ka qenë e jashtëzakonshme për fitimin e çmimit, diçka që nuk arriti të realizohej.
Në ceremoninë e 88-të të dhënies së çmimeve Oscar, çmimin për filmin më të mirë e fitoi “Spotlight”. Aktori më i mirë u shpall Leonardo Dicaprio për rolin në filmin “The Revenant”. Ky çmim i takoi Brie Larson-it për aktoren më të mirë, me rolin në filmin “Room”.
Mark Rylance (“Bridge of Spies”) dhe Alicia Vikander (“The Danish Girl”) u shpallën fitues të çmimeve Oscar për rolet dytësore.
Regjisori më i mirë u shpall Alejandro Inarritu, me filmin “The Revenant”. Çmimin Oscar për skenarin më të mirë e meritoi filmi “Spotlight”.
Filmi i huaj më i mirë u shpall “Son of Saul”, ndërsa çmimin Oscar për filmin më të mirë të animuar e fitoi “Inside Out”. /tesheshi.com/
