Çmimet e naftës mbetën në tregjet ndërkombëtare nën nivelin e 77 dollarëve, të penguar nga frika se dobësimi i ekonomisë në SHBA, Evropë dhe Kinë do të frenonte kërkesën.
Në tregun e Londrës, çmimi i një fuçie pas mesditës ishte 41 cent më i lartë se në mbylljen e djeshme të tregut dhe arriti në 76.56 dollarë. Në tregun amerikan një fuçi u tregtua me 36 cent më lart, me 71.82 dollarë.
Tregtarët po fokusohen tek ekonomia në kuadër të parashikimeve se banka qendrore amerikane do të rrisë me gjysmë pikë përqindje normat e interesit javën e ardhshme për të frenuar inflacionin. Kostot më të larta të huamarrjes do të ngadalësonin aktivitetin ekonomik, gjë që do të nënkuptonte gjithashtu një kërkesë më të dobët për naftë.
Dhe Banka Qendrore Evropiane (ESB) do të ndjekë shembullin e FED, sipas parashikimeve të ekonomistëve në një sondazh të Reuters, pavarësisht nga fakti se ekonomia e Eurozonës është pothuajse me siguri tashmë në recesion.
Në Kinë, rritja e numrit të rasteve të infektimit me koronavirus ndoshta do të zbehë rritjen ekonomike në muajt e ardhshëm, pavarësisht lehtësimit të masave të caktuara epidemiologjike, sipas ekonomistëve, që parashikojnë rimëkëmbjen e aktivitetit vetëm në gjysmën e dytë të 2023.
Në kushte të tilla, çmimet e naftës në kontratat me data më të shkurtra shpërndarjeje ishin më të ulëta se ato me data të shpërndarjes në gjashtë muaj, duke sinjalizuar se tregtarët presin kërkesë më të dobët.
Çmimet nuk reaguan kryesisht ndaj mbylljes së tubacionit Keystone në SHBA për shkak të një rrjedhje nafte, me tregtarët që presin që furnizimet të rifillojnë së shpejti. Në rendin e ditës është edhe ndalimi i cisternave në Bosfor për shkak të kontrolleve të shtuara të sigurisë turke.
Organizata e Vendeve Eksportuese të Naftës (OPEC) njoftoi veçmas se një fuçi e shportës së naftës të anëtarëve të saj ra dje me 1.83 dollarë në 75.3 dollarë. /tesheshi.com/
