Ajo që ishte parathënë ndodhi: Trump shpalli planin e tij të spastrimt etnik të Gazës, jo me armë por me para, duke menduar se do mund ta zgjidhë si biznesmen çështjen më të nxehtë të botës.
Në një takim me Netanyahun në Shtëpinë e Bardhë, ai tha se SHBA do të marrë përsipër Rripin e Gazës të shkatërruar nga lufta dhe do ta zhvillojë atë ekonomikisht pasi palestinezët të zhvendosen diku tjetër, që në praktikë do të thotë se palestinezët, jo vetëm nga Gaza, por edhe nga Bregu Perëndimor, do të dëbohen nga Palestina e tyre. Trump përshkroi planin e tij të egër, pa dhënë detaje.
“SHBA do të marrë Rripin e Gazës dhe ne gjithashtu do të bëjmë punën. Ne do ta zotërojmë atë dhe do të jemi përgjegjës për heqjen e të gjitha bombave të rrezikshme të pashpërthyera dhe armëve të tjera në atë vend”, u tha Trump gazetarëve.
“Nëse është e nevojshme, ne do ta bëjmë atë, do ta marrim atë pjesë, do ta zhvillojmë, do të krijojmë mijëra e mijëra vende pune dhe do të jetë diçka për të cilën e gjithë Lindja e Mesme mund të jetë shumë krenare”, shtoi Trump duke kumtuar planin e tij djallëzor, tipik sionist, duke bërë që të marrë vlerësime nga kryeministri izraelit si “miku më i madh i Izraelit”.
Ai shtoi se kishte folur me liderët rajonalë dhe se ata e mbështesin idenë, pa thënë se kush e kishte mbështetur konkretisht, pra me emër.
I pyetur se kush do të jetonte atje, Trump tha se mund të bëhet një shtëpi për “njerëzit e botës”.
Ministrat izraelitë, të kënaqur me planin e Trump për Gazën: Mëngjes historik për Izraelin!
Pas takimit mes Donald Trump dhe Benjamin Netanyahu në Uashington, ministrat e qeverisë izraelite shprehën kënaqësinë për mesazhet e Trump në lidhje me Rripin e Gazës.
“Kjo është ajo që ndodh kur dy liderë të guximshëm takohen,” tha ministri i Transportit Miri Regev.
Ministri i Energjisë Eli Cohen tha se ky është “një mëngjes historik për shtetin e Izraelit, Lindjen e Mesme dhe botën”.
Kryetari i Knesset-it, Amir Ohana e përshkroi atë si “agimi i një dite të re”.
“Ne kemi një kryeministër të shkëlqyer dhe një president të jashtëzakonshëm amerikan! Faleminderit zotit për këtë mrekulli që bëri për popullin izraelit”, ka shkruar ministri izraelit i Kulturës dhe Sportit, Miki Zohar.
Ministri i Financave Bezalel Smotrich tha: “Së bashku do ta bëjmë botën të madhe përsëri”.
Pra, mjaft që Izraeli është entuziazmuar nga ky projekt për të dalluar se jo paqja por një luftë e egër e pret Lindjen e Mesme. Sepse, ata, amerikanët e izraelitët nuk duan ta lexojnë Gazën e më shumë se një viti: që aty janë në luftë me Zotin e jo thjesht me njerëz, të cilët ndryshe nga Trump e Netanyahu & Co që e duan jetën e aspak vdekjen, ata duan vdekjen më shumë se jetën, me inspirimin nga Zoti ta mbrojtur me çdo çmim tokën, fenë e nderin e tyre. /tesheshi.com/
