Presidenti serb Aleksandar Vuçiç tha të enjten se nuk do të udhëtojë në Tiranë më 6 dhjetor, për samitin e Bashkimit Evropian dhe Ballkanit Perëndimor, duke thënë se vendimi i kryeministrit të Kosovës Albin Kurti për emërimin e Nenad Rashiçit nuk ka marrë dënimin e merituar të BE.
Kurti ka emëruar të enjten liderin e Partisë Demokratike Progresive, Nenad Rashiç, ministër për Komunitete dhe Kthim, duke zëvëndësuar kështu Goran Rakiçin e Srpska-s, i cili udhëhoqi një bojkot të institucioneve të Kosovës, duke u vetëlarguar dhe ai nga qeveria. Dhe kjo lëvizje e ka tërbuar Vuçiçin, aq sa ka shkuar deri aty sa të bojkotojë samitin e Tiranës/
“Emërimi i Rashiçit është i turpshëm, fjala më e butë që mund të përdoret. Ai njeri (Rashiç) fitoi më pak se një për qind në zgjedhje, ashtu si Rada Trajkoviç, e cila ishte në listën e tij. Kjo tregon se ata duan persekutimin dhe dëbimin e serbëve nga Kosova”, tha Vuçiç për TV Pink.
Ai tha se “qëndrimi antiserb i BE-së është qartë”.
“Qëndrimi i mjerë, antiserb që treguan, se atë që ka bërë terroristi Albin Kurti, nuk është kështu… Heshta me muaj, vite, kam vuajtur marrëzi nga të gjithë, si në rajon, edhe në Europë… Ai llum terrorist që bëri sot duhet të kishte marrë dënimin e merituar të BE-së. Dhe kështu sillen çdo herë”, tha presidenti serb, duke ndyrë fjalorin me etiketime të papreçedenta.
Ai deklaroi se janë shkelur jo vetëm normat e Marrëveshjes së Brukselit, por edhe e drejta ndërkombëtare publike.
“Janë shkelur të gjitha parimet dhe normat demokratike, sipas të cilave dikush zgjidhet apo i ofrohet dikujt që ka marrë një numër të madh votash, e jo dikujt që ka marrë një për qind të votave. Dhe vërtet nuk u intereson, sepse është në përputhje me interesat e një fuqie evropiane dhe me interesat që dikush duhet t’i zbatojë, kundër serbëve”, ka theksuar Vuçiç.
“Ata zgjodhën llumin më të keq serb…
“Zgjodhën llumin më të keq serb… Rashiçin, Rada Trajkoviçin. Thjesht nuk ka më keq. Ata nuk e kanë besimin e askujt, por kanë besimin e llumit terrorist Kurti, agjencive perëndimore, të cilët i vendosin atje duke menduar se do ta shkatërrojnë Serbinë. Menduan se do të na trembin, se je vetëm në botë, nuk mund të bësh asgjë…”, tha Vuçiç në një shpërthim të pakontrolluar.
Si pasojë e këtij vendimi, Vuçiç morri vendimin:
“Dhe prandaj askush nga Serbia nuk do të jetë në Tiranë në datën 6 dhjetor. Të gjithë ju nga Ballkani Perëndimor flisni se si Serbia është fajtore për diçka dhe nuk mund të gjeni asgjë për të cilën është fajtore Serbia”, tha presidenti i Serbisë.
Vuçiq tha se herën tjetër duhet të kujdesen për mënyrën se si i drejtohen Serbisë.
“Dhe ju nga Evropa, turp të keni”
“Pastaj herën tjetër që do t’i flisni mirë Serbisë, kujdes nëse zbatohet ajo që u miratua në Bruksel, kujdesuni për deklaratat tuaja, për respektimin e Serbisë dhe qytetarëve të Serbisë”, tha Vuçiç.
Tha se Serbia është më vete dhe se do ta ruajë veten.
“Ka probleme të tjera, probleme në sektorin e energjisë, për të cilat do të flas me qytetarët e Serbisë të shtunën. Dhe sa për këtë o llum terrorist, kujdesuni që të mos lëndoni asnjë serb, bashkë me kuislingët që keni zgjedhur, se serbët bashkë me shtetin e Serbisë do të dinë t’ju përgjigjen. Dhe ju nga Evropa, turp për ju, dhe kjo është një gjë e vogël në krahasim me atë që mund t’ju them vërtet. Të shtunën jam duke përgatitur një përgjigje më të detajuar, të plotë, të përgjegjshme, serioze”, ka përfunduar presidenti serb, vendi i të cilit, duke qenë dhe ai në qeveri(si zëdhënës i Millosheviçit), ka kryer genocid në ish-Jugosllavi.
Dhe ai jo vetëm s’kërkon falje, por nga persekutor kthehet në viktimë, duke tentuar ta kthejë historinë përmbys, mbi të gjithë me dëshmitarë ende gjallë, në jetë. /tesheshi.com/
