Dy operacione blitz, kanë çuar në Milano, mbrojtësin Leonardo Bonucci dhe mesfushorin Lukas Biglia. Mbrojtësi 30 vjeçar ka firmosur një marrëveshje “të rëndë”, ku Juventusi përfiton 40 milion euro cash.
Në bazë të marrëveshjes së përmbyllur të premten, vetë Bonucci, për 5 vitet e ardhshme, do të përfitojë 6.5 milion euro në sezon. Ndërsa për “regjisorin” e Lacios, të kthyer nga sot në “ish”, marrëveshja është mbyllur në shifrat e 20 milion eurove, ku argjentinasi përfiton 3.5 milion në sezon.
Me blerjet e sotme, Milan e çon në 7 numrin e lojtarëve të rinj që ka afruar në skuadër, por klubi kuqezi deklaron se nuk e ka mbyllur ende “qesen” për këtë sezon, sepse që të luftojë për titull, i duhet edhe një sulmues “klasi”.
Objektivat nuk janë lojtarë të çfarëdoshëm, por sulmues që janë vënë në qendër të dëshirave të të gjithë Europës. Beloti i Torinos dhe Aubumeyang i Borusias së Dordmund, janë të preferuarit e Milanit, por përveç konkurrencës, për të patur njërin prej tyre, duhet “hedhur para e madhe”.
Megjithatë, nëse Milani i sezonit të ardhshëm, shndërrohet në skuadrën direkte anti-Juve, çdo lojtar do të ishte i mikluar të vishte fanellën kuq e zi./tesheshi.com/
